وزیراعظم شہباز شریف سے سعودی پاک مشترکہ بزنس کونسل کے چیئرمین شہزادہ منصور بن محمد آل سعود کی قیادت میں اعلیٰ سطح کے سعودی کاروباری وفد نے وزیراعظم ہاؤس میں ملاقات کی۔
ملاقات میں پاکستان اور سعودی عرب کے درمیان اقتصادی تعاون اور سرمایہ کاری کے فروغ پر تبادلہ خیال کیا گیا۔ وزیراعظم نے دونوں ممالک کے دیرینہ برادرانہ تعلقات کو مزید مضبوط اقتصادی شراکت داری میں تبدیل کرنے کے عزم کا اظہار کیا۔
وزیراعظم نے کہا کہ پاکستان ولی عہد و وزیراعظم شہزادہ محمد بن سلمان کے وژن کے مطابق سعودی عرب کے ساتھ اقتصادی تعلقات کو باہمی مفاد پر مبنی اسٹریٹجک شراکت داری میں تبدیل کرنا چاہتا ہے۔
شہزادہ منصور بن محمد آل سعود نے پاکستان میں زراعت، بندرگاہوں، شاہراہوں، ہوائی اڈوں کی آؤٹ سورسنگ، رئیل اسٹیٹ، توانائی، بجلی کی تقسیم اور انفارمیشن ٹیکنالوجی سمیت مختلف شعبوں میں سرمایہ کاری کے مواقع میں دلچسپی کا اظہار کیا۔
وزیراعظم نے سعودی سرمایہ کاری میں دلچسپی کا خیرمقدم کرتے ہوئے کہا کہ دونوں ممالک کے درمیان حکومت سے حکومت اور کاروبار سے کاروبار تعاون کے لیے یہ موزوں وقت ہے۔
شہزادہ منصور بن محمد آل سعود نے پرتپاک استقبال پر وزیراعظم کا شکریہ ادا کیا اور پاکستان کے ساتھ کاروباری روابط مزید مضبوط بنانے کے لیے سعودی حکومت اور کاروباری برادری کی دلچسپی کا اعادہ کیا۔
وزیراعظم نے امید ظاہر کی کہ سعودی وفد کا موجودہ دورہ سابقہ بات چیت کو آگے بڑھانے اور مختلف شعبوں میں مفاہمتی یادداشتوں اور معاہدوں کی راہ ہموار کرے گا۔
سعودی کاروباری وفد دورۂ پاکستان کے دوران اعلیٰ حکومتی نمائندوں اور نجی شعبے کے اہم اسٹیک ہولڈرز سے بھی ملاقاتیں کرے گا۔
