پمز ہسپتال میں نومولود کی ہلاکت کے معاملے پر وزیراعظم شہباز شریف نے وفاقی سیکرٹری صحت اسلم غوری کو فوری طور پر معطل کر کے عہدے سے ہٹا دیا۔
نجی ٹی وی چینل جیو نیوز کے مطابق واقعے پر وزیراعظم شہباز شریف کی زیرِ صدارت اعلیٰ سطحی اجلاس ہوا جس میں انہوں نے متعلقہ افسران پر شدید برہمی کا اظہار کرتے ہوئے واقعے سے متعلق تفصیلی بریفنگ لی اور ہسپتال کے حفاظتی انتظامات سمیت تمام پہلوؤں کا جائزہ لینے کی ہدایت کی۔
ذرائع کے مطابق وزیراعظم نے وفاقی وزیر صحت کو فوری طور پر اسلام آباد پہنچنے کی ہدایت بھی جاری کی۔
انکوائری کمیٹی تشکیل
وزیراعظم نے واقعے کی وجوہات اور غفلت کے ذمہ داروں کا تعین کرنے کے لیے اعلیٰ سطحی انکوائری کمیٹی تشکیل دے دی۔ سابق سیکرٹری داخلہ شاہد خان کو کمیٹی کا سربراہ مقرر کیا گیا ہے جبکہ سیکرٹری اسٹیبلشمنٹ ڈاکٹر بیرسٹر نبیل اعوان کمیٹی کے رکن ہوں گے۔
وزیراعظم نے ہدایت کی کہ واقعے کی جامع اور شفاف تحقیقات کی جائیں اور کوتاہی کے مرتکب افراد کے خلاف قانون کے مطابق سخت کارروائی کی جائے۔
اس واقعے پر ضلعی انتظامیہ نے بھی 8 رکنی انکوائری کمیٹی تشکیل دے دی ہے جس کی سربراہی ایڈیشنل ڈپٹی کمشنر کریں گے۔ کمیٹی میں کیپیٹل ایمرجنسی سروسز کے ڈی جی، ایس پی سٹی، اسسٹنٹ کمشنر آئی نائن اور ڈی جی سی ڈی اے بھی شامل ہیں۔ ذرائع کے مطابق یہ کمیٹی تحقیقات مکمل کر کے 24 گھنٹوں میں رپورٹ پیش کرے گی۔
