بلوچستان کے مختلف اضلاع میں سکیورٹی فورسز اور قانون نافذ کرنے والے اداروں کی کارروائیوں میں 19 دہشتگرد ہلاک، ایک اہم عسکری کمانڈر گرفتار اور 3 مغوی افراد کو بازیاب کرا لیا گیا۔
ذرائع کے مطابق پنجگور میں کارروائی کے دوران 8 دہشتگرد ہلاک ہوئے، جبکہ آواران کے علاقے مالار میں 4 دہشتگرد مارے گئے۔
خضدار میں انٹیلی جنس بیسڈ آپریشن کے دوران مزید 4 دہشتگرد ہلاک کیے گئے۔ کارروائیوں میں دہشتگردوں کے ٹھکانوں اور نیٹ ورکس کو نشانہ بنایا گیا۔
دوسری جانب خاران سے ایک اہم عسکری کمانڈر کو گرفتار کیے جانے کی اطلاعات سامنے آئی ہیں۔ سکیورٹی ادارے دہشتگرد نیٹ ورکس کے سہولت کاروں اور اہم عناصر کے خلاف کارروائیاں جاری رکھے ہوئے ہیں۔
چاغی میں انٹیلی جنس بیسڈ آپریشن کے دوران 3 مغوی افراد، ضیاءالدین، شاہ سلیم اور سید محمد، کو بحفاظت بازیاب کرا لیا گیا۔
ادھر سبی میں بی آر جی کی جانب سے حملے کی کوشش سکیورٹی فورسز نے ناکام بنا دی۔ کارروائی کے دوران ایک دہشتگرد کے زخمی ہونے کی اطلاع ہے۔
دیکھیے: وزیرستان میں انٹیلی جنس بیسڈ آپریشن، ٹی ٹی پی کا اہم کمانڈر مشتاق عرف جنم ہلاک
