پشاور کے علاقے ترناب فارم میں دہشت گردوں نے چمکنی تھانے کی پولیس چیک پوسٹ کو دستی بم حملے کا نشانہ بنایا، جس کے نتیجے میں 7 افراد زخمی ہوگئے، جن میں 2 پولیس اہلکار بھی شامل ہیں۔
ابتدائی اطلاعات کے مطابق حملے کے وقت پولیس اہلکار چیک پوسٹ پر ڈیوٹی انجام دے رہے تھے۔ دستی بم کے دھماکے کے بعد زخمیوں کو فوری طور پر طبی امداد کے لیے قریبی اسپتال منتقل کیا گیا، جہاں ان کا علاج جاری ہے۔
واقعے کی اطلاع ملتے ہی مقامی پولیس، بم ڈسپوزل یونٹ اور کرائم سین ٹیمیں موقع پر پہنچ گئیں۔ سیکیورٹی اہلکاروں نے جائے وقوعہ کو محفوظ بنا کر شواہد اکٹھے کرنا شروع کردیے، جبکہ دھماکے کی نوعیت اور حملے میں استعمال ہونے والے مواد سے متعلق بھی تحقیقات کی جا رہی ہیں۔
حملے کے بعد پولیس نے ملزمان کی گرفتاری کے لیے قریبی علاقوں میں سرچ آپریشن شروع کردیا ہے۔ پولیس ذرائع کے مطابق مشتبہ افراد کی نقل و حرکت کا سراغ لگانے کے لیے مختلف پہلوؤں سے تحقیقات جاری ہیں۔
حکام کا کہنا ہے کہ واقعے سے متعلق مزید معلومات تحقیقات مکمل ہونے کے بعد سامنے آئیں گی، جبکہ علاقے میں سکیورٹی مزید سخت کردی گئی ہے۔
دیکھیے: بلوچستان میں سکیورٹی فورسز کا بڑا آپریشن، 19 دہشتگرد ہلاک، اہم عسکری کمانڈر گرفتار
