جنوبی وزیرستان کے مکین بازار میں آئی ای ڈی دھماکے کے نتیجے میں مقامی امن کمیٹی کے رکن عنایت اللہ جاں بحق جبکہ 8 افراد زخمی ہوگئے۔
پولیس کے مطابق دھماکا جمعہ کی صبح تقریباً 10 بج کر 45 منٹ پر مکین بازار میں ہوا۔ ابتدائی اطلاعات میں 9 افراد کے زخمی ہونے کی اطلاع سامنے آئی تھی، تاہم بعد ازاں ایک زخمی عنایت اللہ زخموں کی تاب نہ لاتے ہوئے دم توڑ گئے۔
رپورٹس کے مطابق دھماکا موٹرسائیکل پر نصب آئی ای ڈی کے ذریعے کیا گیا، جس کی زد میں بازار میں موجود افراد آئے۔ زخمیوں میں امن کمیٹی کے ارکان شرافت خان اور بانگی خان بھی شامل ہیں۔
دھماکے کے بعد مقامی افراد اور امدادی ٹیموں نے زخمیوں کو طبی مراکز منتقل کیا، جہاں انہیں طبی امداد فراہم کی گئی۔ بعض زخمیوں کو مزید علاج کے لیے رزمک اسپتال منتقل کیا گیا۔
دھماکے سے مکین بازار کی متعدد دکانوں اور وہاں موجود سامان کو بھی نقصان پہنچا۔ واقعے کے بعد پولیس اور سکیورٹی اہلکاروں نے علاقے کو گھیرے میں لے لیا اور شواہد اکٹھے کرنے کے ساتھ سرچ آپریشن شروع کردیا۔
دیکھیے: باجوڑ ڈی ایچ کیو ہسپتال میں سہولیات کا فقدان: پی ٹی آئی حکومت کے دعوے کھوکھلے ثابت
