نیویارک: سعودی عرب نے خطے میں کشیدگی کم کرنے اور تنازعات کے حل کے لیے پاکستان اور قطر کی سفارتی کوششوں کی مکمل تائید کی ہے۔
اجلاس سے خطاب کرتے ہوئے سعودی وزیر خارجہ شہزادہ فیصل بن فرحان نے کہا کہ ریاستی خودمختاری کا احترام اور بات چیت ہی پائیدار امن کی بنیاد ہے۔
سعودی وزیر خارجہ نے واضح کیا کہ خلیجی خطے کا استحکام عالمی معیشت سے وابستہ ہے۔ انہوں نے کہا کہ توانائی کی بلا تعطل فراہمی اور عالمی سپلائی چین کا تسلسل اسی خطے کے امن پر منحصر ہے۔
انہوں نے بین الاقوامی آبی گزرگاہوں میں جہاز رانی کی آزادی اور بحری سلامتی یقینی بنانے کا مطالبہ کیا۔
یہ بیانات ایسے وقت میں سامنے آئے ہیں جب پاکستان اور قطر خطے میں تناؤ کم کرنے اور سفارتی روابط بڑھانے کے لیے سرگرم عمل ہیں۔ اس سے قبل قطر بھی امریکا اور ایران کے مابین پاکستان کی سفارتی کاوشوں کی حمایت کر چکا ہے۔
دوسری جانب، نیویارک میں سعودی عرب، پاکستان اور ترکیہ کے وزرائے خارجہ کے درمیان ایک سہ فریقی ملاقات بھی ہوئی۔ اس نشست میں علاقائی صورتحال، بحرانوں کے حل اور بحری آمدورفت کے امور پر تبادلہ خیال کیا گیا۔
تینوں ممالک کے وزرائے خارجہ نے خطے میں امن کے قیام کے لیے مشترکہ کوششیں جاری رکھنے کے عزم کا اعادہ کیا۔
شہزادہ فیصل بن فرحان نے اپنے خطاب میں فلسطینی عوام کو درپیش بحران کا ذکر بھی کیا۔ انہوں نے فلسطینیوں کی جبری بے دخلی کی شدید مخالفت کی اور عالمی قوانین پر عمل درآمد کا مطالبہ کیا۔
سعودی وزیر خارجہ نے یمن میں شہریوں کے تحفظ اور خطے کی سلامتی کے لیے سفارتی حل کی ضرورت پر بھی زور دیا۔