گورنر خیبرپختونخوا فیصل کریم کنڈی نے واضح کیا ہے کہ جو عناصر آئینِ پاکستان کو تسلیم نہیں کرتے، ان کے ساتھ کسی قسم کے مذاکرات نہیں ہوں گے۔ ان کا کہنا تھا کہ ملک اور بالخصوص خیبرپختونخوا میں پائیدار امن کا قیام ناگزیر ہے۔
پشاور میں میڈیا سے گفتگو کرتے ہوئے گورنر نے پاکستان تحریک انصاف کو لانگ مارچ کی کال پر چیلنج کیا۔ انہوں نے دعویٰ کیا کہ پی ٹی آئی میں لانگ مارچ کی سکت نہیں۔ ان کا کہنا تھا کہ یہ رہنما اسلام آباد جانے سے گریزاں ہیں اور گرفتاریوں کی آڑ لے رہے ہیں۔
صوبے میں بدامنی
فیصل کریم کنڈی نے کہا کہ تحریک انصاف صرف میڈیا کی حد تک بیانات جاری کر رہی ہے جبکہ عوام ان کا ساتھ نہیں دے رہے۔ انہوں نے زور دیا کہ خیبرپختونخوا میں بدامنی کو ہر صورت قابو کیا جائے گا۔ دہشت گردوں اور ان کے سہولت کاروں کے خلاف سخت کارروائی ہوگی۔
گورنر راج
گورنر خیبرپختونخوا کا کہنا تھا کہ امن و امان کی موجودہ صورتحال کو سنبھالنا صوبائی حکومت کے بس سے باہر ہو چکا ہے۔ انہوں نے متنبہ کیا کہ ملکی آئین کے تحت صوبے میں گورنر راج نافذ کرنے کا اختیار بہرحال موجود ہے۔