پاکستان تحریک انصاف نے 4 اکتوبر کے مجوزہ لانگ مارچ کی حکمت عملی میں بڑی تبدیلی کر دی ہے۔ پارٹی قیادت نے لانگ مارچ کو وفاقی دارالحکومت کے بجائے صوابی یا اٹک تک ہی محدود رکھنے کا حتمی فیصلہ کیا ہے۔
یہ اہم فیصلہ وزیر اعلیٰ خیبر پختونخوا کی زیر صدارت منعقدہ اعلیٰ سطحی اجلاس میں کیا گیا۔ اجلاس کے دوران 4 اکتوبر کے احتجاجی مارچ کے انتظامی اور سیکیورٹی امور کا تفصیلی جائزہ لیا گیا۔
پی ٹی آئی کے مرکزی سیکرٹری اطلاعات شوکت یوسفزئی نے تصدیق کی کہ مارچ کے دائرہ کار کو محدود رکھا جائے گا۔ ان کا کہنا تھا کہ صوابی یا اٹک کے کسی مناسب اور کھلے مقام پر کارکنوں کے لیے ایک بڑا ٹینٹ سٹی قائم کیا جائے گا۔
شوکت یوسفزئی نے واضح کیا کہ لانگ مارچ کو مکمل طور پر منظم اور پرامن رکھا جائے گا۔ ٹینٹ سٹی کے درست مقام کا حتمی تعین متعلقہ ضلعی تنظیمیں اور اراکین پارلیمنٹ باہمی مشاورت سے کریں گے۔
انہوں نے مزید بتایا کہ اٹک یا صوابی کے پڑاؤ سے آگے کب اور کس وقت پیش قدمی کرنی ہے، اس کا فیصلہ بروقت چین آف کمانڈ کے ذریعے پہنچایا جائے گا۔ تمام کارکنوں اور منتظمین کو کسی بھی غیر متوقع صورتحال کے لیے تیار رہنے کی ہدایت کی گئی ہے۔
سیکرٹری اطلاعات نے زور دیا کہ کارکن ہر حال میں نظم و ضبط اور تحمل کا مظاہرہ کریں گے۔ ان کے مطابق کارکنوں کا جذبہ بلند ہے جبکہ وفاقی حکومت احتجاج کی کال سے بوکھلاہٹ کا شکار ہو چکی ہے۔