مکہ مکرمہ: سعودی سکیورٹی حکام نے مکہ مکرمہ میں خانہ کعبہ کے احاطے میں خودکش حملے کی کوشش اور بارودی جیکٹ نہ پھٹنے سے متعلق سوشل میڈیا پر گردش کرنے والی خبروں کو قطعی طور پر بے بنیاد اور جعلی قرار دے دیا ہے۔
سعودی حکام کے وضاحتی بیان کے مطابق مسجد الحرام سے ایک ایسے شخص کو حراست میں لیا گیا ہے جو وہاں موجود زائرین کو ہراساں کر رہا تھا اور خوف و ہراس پیدا کرنے کی کوششوں میں ملوث تھا۔
حکام نے ان تمام افواہوں کو سختی سے مسترد کر دیا ہے جن میں دعویٰ کیا گیا تھا کہ گرفتار شخص نے خودکش جیکٹ پہن رکھی تھی یا اس کے قبضے سے بارودی مواد ملا ہے۔ حکام کا کہنا ہے کہ اس واقعے کو کسی بھی نوعیت کے خودکش حملے سے جوڑنا سراسر غلط ہے۔
سکیورٹی فورسز نے گرفتار ملزم کے خلاف ابتدائی قانونی کارروائی مکمل کر کے اسے مزید تحقیقات اور عدالتی کارروائی کے لیے پبلک پراسیکیوشن کے سپرد کر دیا ہے۔
سعودی سکیورٹی حکام نے عوام اور زائرین سے اپیل کی ہے کہ وہ سوشل میڈیا پر غیر مصدقہ اطلاعات پھیلانے سے گریز کریں اور کسی بھی واقعے سے متعلق معلومات کے لیے صرف مستند اور باضابطہ سرکاری ذرائع پر بھروسا کریں۔