سڈنی/کراچی: پاکستان سپر لیگ میں کراچی کنگز کے کپتان ڈیوڈ وارنر قانونی مشکل میں پھنس گئے، آسٹریلیا میں انہیں مبینہ طور پر نشے کی حالت میں گاڑی چلانے پر عدالت میں طلب کر لیا گیا ہے۔
میڈیا رپورٹس کے مطابق 39 سالہ آسٹریلوی کرکٹر کو اتوار کی شام سڈنی کے علاقے ماروبرا میں رینڈم بریتھ ٹیسٹ کے دوران روکا گیا، جہاں ان کے خون میں الکوحل کی مقدار 0.104 ریکارڈ کی گئی، جو مقررہ قانونی حد سے دوگنی ہے۔
نیو ساؤتھ ویلز میں مکمل لائسنس رکھنے والے ڈرائیورز کیلئے الکوحل کی قانونی حد 0.05 مقرر ہے۔
پولیس کے مطابق وارنر نے مبینہ طور پر چیکنگ پوائنٹ سے کچھ فاصلے پر اپنی گاڑی روک کر پارک کی، جس پر ٹریفک اہلکاروں نے انہیں روڈ سائیڈ ٹیسٹ کیلئے کہا، جو مثبت آیا۔
بعد ازاں انہیں حراست میں لے کر ماروبرا پولیس اسٹیشن منتقل کیا گیا، جہاں دوسرے ٹیسٹ میں بھی الکوحل کی یہی مقدار سامنے آئی۔
پولیس نے وارنر کو “درمیانی سطح کی الکوحل کے ساتھ ڈرائیونگ” کے الزام میں نوٹس جاری کیا ہے، اور انہیں 7 مئی 2026 کو ڈاؤننگ سینٹر لوکل کورٹ میں پیش ہونے کی ہدایت کی گئی ہے۔
واضح رہے کہ ڈیوڈ وارنر اس وقت پاکستان سپر لیگ کے 11ویں ایڈیشن میں کراچی کنگز کی قیادت کر رہے ہیں اور وہ ایونٹ کے دوسرے مرحلے کیلئے 9 اپریل کو کراچی پہنچنے والے ہیں۔
دیکھئیے:پی ایس ایل 11: نسیم شاہ انجری کے باعث ٹورنامنٹ سے باہر، راولپنڈی کو بڑا دھچکا