اسلام آباد: پاکستان نے بیرونی قرضوں کی ادائیگی کے سلسلے کو جاری رکھتے ہوئے یورو بانڈ کی مد میں 1.3 ارب ڈالر کی ادائیگی کر دی، جس سے ملک کی مالی ذمہ داریوں کو بروقت پورا کرنے کے عزم کا اظہار کیا گیا ہے۔
وزارت خزانہ کے مطابق یہ یورو بانڈ 10 سالہ مدت پوری ہونے پر میچور ہوا تھا، جس کی اصل رقم کے ساتھ منافع کی ادائیگی بھی مکمل کر دی گئی ہے۔
حکام کے مطابق پاکستان نے یورو بانڈ پر 12 کروڑ 61 لاکھ ڈالر منافع (کوپن پیمنٹ) بھی ادا کیا، جس کے بعد مجموعی ادائیگی تقریباً 1.42 ارب ڈالر تک پہنچ گئی۔
وزارت خزانہ کا کہنا ہے کہ قرضوں کی بروقت ادائیگی سے عالمی مالیاتی منڈیوں میں پاکستان کی ساکھ کو تقویت ملتی ہے اور سرمایہ کاروں کا اعتماد بحال رہتا ہے۔
ماہرین کے مطابق حالیہ ادائیگیاں اس بات کی نشاندہی کرتی ہیں کہ پاکستان اپنی بیرونی مالی ذمہ داریوں کو پورا کرنے کی صلاحیت رکھتا ہے، جبکہ زرمبادلہ ذخائر اور مالی نظم و ضبط میں بہتری کے باعث ادائیگیوں کا سلسلہ برقرار ہے۔
حکام نے مزید بتایا کہ حکومت آئی ایم ایف پروگرام اور دیگر اصلاحاتی اقدامات کے ذریعے مالی استحکام کو مضبوط بنانے پر بھی کام کر رہی ہے تاکہ مستقبل میں قرضوں کے دباؤ کو کم کیا جا سکے۔
دیکھئیے:معاشی استحکام کی جانب بڑی پیش رفت: پاکستان نے یو اے ای کے ڈیپازٹس کی واپسی شروع کر دی
