ڈھاکا: بنگلادیش نے پہلے ٹیسٹ میچ میں پاکستان کو 104 رنز کی عبرتناک شکست دے کر سیریز میں برتری حاصل کر لی ہے۔ کھیل کے پانچویں اور آخری روز 268 رنز کے ہدف کے تعاقب میں پاکستانی بیٹنگ لائن ریت کی دیوار ثابت ہوئی اور پوری ٹیم دوسری اننگز میں محض 163 رنز بنا کر پویلین لوٹ گئی۔ بنگلادیشی بولرز کے سامنے پاکستانی بیٹرز بے بس دکھائی دیے اور وقفے وقفے سے گرتی وکٹوں نے فتح کی تمام امیدیں ختم کر دیں۔
پاکستان کی دوسری اننگز کا آغاز ہی مایوس کن رہا، جب پہلی وکٹ صرف 3 رنز پر گر گئی۔ پہلی اننگز کے سنچری میکر اذان اویس اس بار صرف 15 رنز بنا سکے، جبکہ کپتان شان مسعود ایک بار پھر ناکام رہے اور صرف 2 رنز بنا کر آؤٹ ہوئے۔ عبداللہ فضل نے 66 رنز کی مزاحمتی اننگز کھیل کر کچھ دیر بنگلادیشی بولرز کو پریشان کیا، لیکن دوسرے اینڈ سے تعاون نہ ملنے کی وجہ سے وہ بھی ہمت ہار گئے۔ دیگر بیٹرز میں سلمان علی آغا نے 26، سعود شکیل نے 15 اور حسان خان نے 12 رنز بنائے۔ پوری ٹیم تاش کے پتوں کی طرح بکھر گئی اور بنگلادیش نے ایک تاریخی فتح اپنے نام کر لی۔
اس سے قبل بنگلادیش نے کھیل کے پانچویں روز اپنی دوسری اننگز 240 رنز 9 کھلاڑی آؤٹ پر ڈکلیئر کر کے پاکستان کو جیت کے لیے 268 رنز کا ہدف دیا تھا۔ بنگلادیش کی دوسری اننگز میں کپتان نجم الحسن شنتو نے 87 اور مومن الحق نے 56 رنز کی شاندار اننگز کھیل کر ٹیم کو مستحکم پوزیشن میں پہنچایا۔ پاکستان کی جانب سے حسن علی اور نعمان علی نے 3، 3 جبکہ شاہین آفریدی نے 2 وکٹیں حاصل کیں۔ اسی اننگز کے دوران نعمان علی نے ٹیسٹ کرکٹ میں اپنی 100 وکٹیں مکمل کرنے کا اعزاز بھی حاصل کیا، جو اس میچ میں پاکستان کے لیے واحد مثبت پہلو رہا۔
میچ کے آغاز میں پاکستان نے ٹاس جیت کر بنگلادیش کو پہلے بیٹنگ کی دعوت دی تھی۔ میزبان ٹیم نے پہلی اننگز میں 413 رنز کا بھاری اسکور بنایا تھا، جس کے جواب میں پاکستانی ٹیم اپنی پہلی اننگز میں 386 رنز بنا کر آؤٹ ہوئی اور بنگلادیش کو 27 رنز کی پہلی اننگز کی برتری حاصل ہوئی۔ پہلی اننگز میں پاکستان کے اذان اویس نے سنچری اسکور کی تھی لیکن دوسری اننگز میں مجموعی ناکامی نے میچ کا پانسہ بنگلادیش کے حق میں پلٹ دیا۔ بنگلادیش کی اس فتح نے پاکستانی کرکٹ ٹیم کی ٹیسٹ فارمیٹ میں حالیہ کارکردگی پر کئی سوالات کھڑے کر دیے ہیں۔
دیکھئیے:ڈھاکا ٹیسٹ: چوتھے روز بنگلادیش کی مجموعی برتری 179 رنز ہوگئی؛دوسری اننگز میں 3 وکٹ پر 152 رنز بنالیے
