کراچی: پاکستانی شوبز انڈسٹری کے معروف اداکار فواد خان اور اداکارہ عائزہ خان پہلی بار ایک ہی فلم میں مرکزی کردار ادا کرتے نظر آئیں گے، جس کی ہدایت کاری نامور ہدایت کار ندیم بیگ کریں گے۔
رپورٹس کے مطابق فواد خان اور عائزہ خان ندیم بیگ کے نئے فلمی پراجیکٹ میں ایک ساتھ کاسٹ کیے گئے ہیں۔ ندیم بیگ کو حال ہی میں اپنی فلم ’لو گرو‘ کی کامیابی پر خاصی پذیرائی ملی تھی، جس کے بعد ان کے نئے منصوبے کو بھی غیر معمولی توجہ حاصل ہو رہی ہے۔
یہ پہلا موقع ہوگا جب فواد خان اور عائزہ خان کسی فلم یا ڈرامے میں ایک ساتھ نظر آئیں گے، اگرچہ اس سے قبل دونوں ایک اشتہار میں مختصر طور پر ایک ساتھ دکھائی دے چکے ہیں۔ مداح طویل عرصے سے دونوں اداکاروں کو ایک ساتھ کسی بڑے پراجیکٹ میں دیکھنے کے منتظر تھے۔
ذرائع کے مطابق فلم کی شوٹنگ جلد شروع ہونے کا امکان ہے جبکہ اس کی ریلیز 2027 میں متوقع ہے۔ فلم کی کہانی اور دیگر کاسٹ سے متعلق تفصیلات تاحال سامنے نہیں آئی ہیں۔
واضح رہے کہ فواد خان اور عائزہ خان دونوں پاکستانی انڈسٹری کے مقبول ترین اداکاروں میں شمار ہوتے ہیں اور ان کی مشترکہ فلم کو شائقین کی جانب سے بڑی توقعات کے ساتھ دیکھا جا رہا ہے۔
دیکھئیے:رمشا خان نے خوشال خان سے شادی کی تصدیق کر دی، تصاویر لیک ہونے پر شدید ردعمل
