لائبہ خان نے شوہر جواد سے پہلی ملاقات اور محبت کی کہانی سے پردہ اٹھا دیا

پاکستانی اداکارہ لائبہ خان نے پہلی بار اپنے شوہر جواد کے ساتھ اپنی پہلی ملاقات، محبت اور شادی کی تفصیلات مداحوں کے ساتھ شیئر کر دی ہیں۔ ایک نجی ٹی وی پروگرام میں گفتگو کرتے ہوئے لائبہ خان نے انکشاف کیا کہ ان کے اور جواد کے درمیان رابطے کا آغاز 2019 میں ایک مشترکہ دوست کے ذریعے ہوا تھا، جو ابتدائی طور پر محض رسمی نوعیت کا تھا۔

اداکارہ کے مطابق جواد ہر سال انہیں باقاعدگی سے سالگرہ کی مبارکباد دیتے رہے، تاہم ان کی پہلی باقاعدہ ملاقات 2022 میں ایک تقریب کے دوران ہوئی جہاں دونوں نے ایک دوسرے کو بہتر طور پر جانا۔ لائبہ خان نے بتایا کہ یہ دوستی وقت کے ساتھ اعتماد اور محبت میں بدلی، جس کے بعد جواد نے انہیں شادی کی پیشکش کی۔ اداکارہ نے بتایا کہ ان کے والدین کو جواد کی شخصیت بے حد پسند آئی اور دونوں نے 2024 میں مدینہ منورہ کی پاک سرزمین پر سادگی کے ساتھ نکاح کیا۔

لائبہ خان نے اپنے شوہر کی ماضی کی جدوجہد پر روشنی ڈالتے ہوئے بتایا کہ جواد کا تعلق فارمیسی کے شعبے سے ہے اور وہ امریکہ میں مقیم رہ چکے ہیں۔ انہوں نے انکشاف کیا کہ جواد نے امریکہ میں ٹیکسی چلانے سمیت مختلف محنت طلب ملازمتیں کیں اور اپنی سخت محنت کے بل بوتے پر آج وہ ایک کامیاب کاروباری شخصیت بن چکے ہیں۔ اداکارہ نے اپنے شوہر کو ایک سادہ مزاج، خاندانی اور بے حد تعاون کرنے والا انسان قرار دیا جو ان کے لیے ہر موڑ پر مضبوط سہارا ثابت ہوئے۔

واضح رہے کہ لائبہ خان نے ابتدائی طور پر اپنے شوہر کی شناخت کو نجی رکھا تھا، تاہم اب انہوں نے اپنی شادی اور ہلدی کی تصاویر سوشل میڈیا پر شیئر کی ہیں، جنہیں مداحوں کی جانب سے بے حد سراہا جا رہا ہے اور جوڑے کے لیے نیک تمناؤں کا اظہار کیا جا رہا ہے۔

دیکھیے: انقلاب سے انجام تک: آیت اللہ خامنہ ای کی زندگی، اقتدار اور متنازع وراثت