ممبئی: بھارتی رئیلیٹی شو بگ باس سیزن 9 سے شہرت پانے والی ایرانی اداکارہ مندانا کریمی نے 16 سال بعد بھارت کو خیرباد کہہ دیا ہے۔ اداکارہ نے 18 برس کی عمر میں ایران چھوڑ کر بھارت میں اپنی فنی زندگی کا آغاز کیا تھا۔ اب امریکہ اور ایران کے حالیہ تنازع اور ایرانی سپریم لیڈر آیت اللہ خامنہ ای کے انتقال کے بعد انہوں نے بھارت چھوڑنے کا حتمی فیصلہ کیا ہے۔
انسٹاگرام پر اپنے مداحوں سے گفتگو کرتے ہوئے مندانا کریمی نے کہا کہ انہوں نے کبھی نہیں سوچا تھا کہ وہ بھارت کو اس طرح الوداع کہیں گی۔ انہوں نے ممبئی کو اپنا دوسرا گھر قرار دیتے ہوئے اسے چھوڑنے کے فیصلے کو مشکل قرار دیا ہے۔ ان کے مطابق یہ ایک نئی شروعات ہوگی تاہم انہوں نے اپنی اگلی منزل کے بارے میں واضح طور پر کچھ نہیں بتایا۔
مندانا کریمی نے بھارت سے اپنی مایوسی کا اظہار کرتے ہوئے کہا کہ انہیں یہاں کسی قسم کی سپورٹ نہیں ملی۔ ان کا کہنا تھا کہ ایران کے سپریم لیڈر کے انتقال کے بعد بھارت میں لوگ سڑکوں پر نکل کر ماتم کر سکتے ہیں لیکن وہ ایسا نہیں کر سکیں۔ اداکارہ نے یہ بھی انکشاف کیا کہ سکیورٹی وجوہات کی بنا پر وہ ایک جگہ محدود ہو کر رہ گئی ہیں اور ان کے قریبی دوستوں کو بھی ان کے پتے کا علم نہیں ہے۔
اداکارہ پر 10 سال قبل ایران میں داخلے پر پابندی عائد کر دی گئی تھی جس کے باعث وہ اپنے آبائی وطن واپس نہیں جا سکتیں۔ وہ گزشتہ 6 سالوں سے بالی وڈ فلموں میں اداکاری چھوڑ چکی ہیں اور ان کا کہنا ہے کہ وہ اب میڈیا کے ذریعے ایرانیوں کی آواز دنیا تک پہنچانے کی کوشش کر رہی ہیں۔ مندانا کی پیدائش اور پرورش ایران میں ہوئی جہاں انہوں نے اپنی زندگی کے ابتدائی 18 سال گزارے تھے۔
