پاکستان ہاکی فیڈریشن (پی ایچ ایف) نے ملک میں بین الاقوامی ہاکی کی بحالی کے لیے کوریا کو 4 ٹیسٹ میچوں پر مشتمل سیریز کھیلنے کے لیے پاکستان آنے کی باقاعدہ دعوت دے دی ہے۔
پی ایچ ایف کے صدر محی الدین وانی نے ایک نجی ٹی وی پروگرام میں گفتگو کرتے ہوئے اس اہم پیش رفت کی تصدیق کی ہے۔ انہوں نے بتایا کہ اس تاریخی سیریز کے لیے بات چیت ابھی ابتدائی مرحلے میں ہے، تاہم پی ایچ ایف کی بھرپور خواہش ہے کہ یہ سیریز جولائی کے آخری ہفتے میں پاکستان میں کھیلی جائے۔
ان کا کہنا تھا کہ کوریائی حکام کے ساتھ معاملات طے پانے کے بعد میچز کے لیے شہروں کا حتمی فیصلہ کیا جائے گا کہ تمام مقابلوں کا انعقاد کسی ایک ہی شہر میں کیا جائے یا پھر ملک کے مختلف شہروں میں میچز شیڈول کیے جائیں۔ محی الدین وانی نے امید ظاہر کی کہ اگر کوریا کا یہ دورہ طے پا جاتا ہے تو پاکستان کی سرزمین پر بین الاقوامی ہاکی کی واپسی سے کھیل کے ایک نئے اور شاندار سفر کا آغاز ہو سکے گا۔
پاکستان ہاکی ٹیم 15 سے 30 اگست تک بیلجیئم اور نیدر لینڈز میں شیڈول ہاکی ورلڈ کپ میں شرکت کے لیے روانہ ہوگی۔ قومی مینیجمنٹ اس اہم ترین عالمی ایونٹ سے قبل ہوم گراؤنڈ پر کوریا کے خلاف 4 ٹیسٹ میچز کھیل کر اپنی تیاریوں کو حتمی شکل دینے کی خواہش مند ہے۔
عالمی درجہ بندی میں اس وقت پاکستان 12ویں اور کوریا 20ویں نمبر پر موجود ہے۔ واضح رہے کہ آئندہ ہاکی ورلڈ کپ کے لیے کوریا کی ٹیم کوالیفائی کرنے میں ناکام رہی ہے، جبکہ پاکستان ایونٹ میں ٹرافی کے حصول کے لیے میدان میں اترے گا۔
