Skip to content 
ٹی ٹوئنٹی ورلڈ کپ اور آسٹریلیا کے خلاف ہوم سیریز کے لیے پاکستان ٹی ٹوئنٹی اسکواڈ کے ممکنہ کھلاڑیوں کے نام سامنے آ گئے ہیں، جن پر حتمی مشاورت رواں ہفتے متوقع ہے۔
ذرائع کے مطابق قومی ٹیم کے مجوزہ اسکواڈ کے حوالے سے ہیڈ کوچ مائیک ہیسن، کپتان سلمان علی آغا اور سلیکشن کمیٹی کے درمیان تفصیلی مشاورت کی جائے گی۔ ممکنہ کھلاڑیوں میں کپتان سلمان علی آغا، صاحبزادہ فرحان، صائم ایوب، فخر زمان، شاداب خان، بابر اعظم، فہیم اشرف، محمد نواز، عثمان خان اور ابرار احمد شامل ہیں۔
اسی طرح فاسٹ بولرز میں شاہین شاہ آفریدی، نسیم شاہ، حارث رؤف، سلمان مرزا اور خواجہ نافع کے نام زیر غور ہیں، جبکہ عبدالصمد، وسیم جونیئر اور عثمان طارق کو ریزرو کھلاڑیوں میں شامل کیے جانے کا امکان ظاہر کیا جا رہا ہے۔
ہیڈ کوچ مائیک ہیسن دورۂ سری لنکا کے اختتام پر لاہور پہنچ رہے ہیں، جبکہ قومی ٹی ٹوئنٹی اسکواڈ کے کھلاڑی سری لنکا میں سیریز کھیلنے کے بعد آج وطن واپس پہنچ رہے ہیں۔ واپسی کے بعد کوچ، کپتان اور سلیکٹرز کے درمیان حتمی مشاورت ہوگی۔
ذرائع کا کہنا ہے کہ مشاورت مکمل ہونے کے بعد چیئرمین پاکستان کرکٹ بورڈ محسن نقوی کی منظوری سے ٹی ٹوئنٹی ورلڈ کپ کے لیے اسکواڈ کا باضابطہ اعلان کیا جائے گا۔ پاکستان کرکٹ بورڈ پہلے ہی ابتدائی اسکواڈ آئی سی سی کو ارسال کر چکا ہے، تاہم 31 جنوری تک کھلاڑیوں کے ناموں میں رد و بدل کی گنجائش موجود ہے۔
دیکھیں: ترکی کا سعودی عرب اور پاکستان کے دفاعی اتحاد میں شمولیت کا امکان
