کراچی: پاکستان سپر لیگ (پی ایس ایل) 11 کے میچ میں کوئٹہ گلیڈی ایٹرز نے شاندار کارکردگی کا مظاہرہ کرتے ہوئے لاہور قلندرز کو 6 وکٹوں سے با آسانی شکست دے دی۔
کراچی میں کھیلے گئے میچ میں لاہور قلندرز نے ٹاس جیت کر پہلے بیٹنگ کا فیصلہ کیا، تاہم پوری ٹیم 19.5 اوورز میں 134 رنز بنا کر آؤٹ ہو گئی۔ لاہور کی جانب سے حسیب اللہ 33 رنز کے ساتھ نمایاں رہے، جبکہ اسامہ میر نے 22، فخر زمان نے 20، عبداللہ شفیق نے 17 اور سکندر رضا نے 15 رنز اسکور کیے۔
کوئٹہ گلیڈی ایٹرز کی جانب سے جہانداد خان اور عثمان طارق نے شاندار بولنگ کرتے ہوئے 3، 3 وکٹیں حاصل کیں اور لاہور کی بیٹنگ لائن کو دباؤ میں رکھا۔
ہدف کے تعاقب میں کوئٹہ گلیڈی ایٹرز نے پراعتماد بیٹنگ کرتے ہوئے 135 رنز کا ہدف 17ویں اوور میں 4 وکٹوں کے نقصان پر حاصل کر لیا۔ رائلی روسو 60 رنز بنا کر ناٹ آؤٹ رہے، جبکہ حسن نواز نے 49 رنز کی عمدہ اننگز کھیل کر ٹیم کی فتح میں اہم کردار ادا کیا۔
پوائنٹس ٹیبل کے مطابق کوئٹہ گلیڈی ایٹرز 7 میچز میں 6 پوائنٹس کے ساتھ چوتھی پوزیشن پر موجود ہے، جبکہ لاہور قلندرز 6 میچز میں 4 پوائنٹس کے ساتھ ساتویں نمبر پر ہے۔
دیکھئیے:پی ایس ایل 11: بابر اعظم کی فارم میں واپسی پر سلمان نصیر نے نظر اتاری، ویڈیو وائرل