آج 12 ربیع الاول کا مبارک دن ہے، جس پر ملک بھر میں سرورِ کونین، رحمت اللعالمین، خاتم النبیین حضرت محمد ﷺ کی ولادتِ باسعادت کا جشن نہایت عقیدت، محبت اور مذہبی وقار کے ساتھ منایا جا رہا ہے۔ ملک کے طول و عرض میں محافلِ نعت کا انعقاد جاری ہے اور درود و سلام کی صداؤں نے فضاؤں کو معطر کر رکھا ہے۔
دن کا آغاز روایتی انداز میں توپوں کی سلامی سے ہوا۔ وفاقی دارالحکومت اسلام آباد میں 31 جبکہ تمام صوبائی دارالحکومتوں میں 21، 21 توپوں کی سلامی دی گئی، جس سے فضا تکبیر کے نعرے سے گونج اٹھی۔
نمازِ فجر کے بعد مساجد اور گھروں میں ملکی سلامتی، ترقی، خوشحالی اور امتِ مسلمہ کے اتحاد کے لیے بالخصوص دعا کی گئی۔
مبارک دن کی مناسبت سے شہری عشقِ رسول ﷺ میں معطر ہو کر ملک بھر میں شاندار تقریبات کا اہتمام کر رہے ہیں۔ مساجد، عمارتوں، بازاروں اور چوراہوں کو برقی قمقموں اور سبز پرچموں سے خوبصورت انداز میں سجایا گیا ہے۔
ملک کے چاروں صوبوں پنجاب، سندھ، خیبرپختونخوا اور بلوچستان کے علاوہ آزاد کشمیر اور گلگت بلتستان میں بھی مرکزی جلوس عقیدت و احترام کے ساتھ برآمد ہو رہے ہیں۔ شہر شہر عقیدت مند جلوسوں اور محافلِ نعت میں شریک ہو کر درود و سلام کا نذرانہ پیش کر رہے ہیں۔
سکیورٹی اقدامات
وفاقی دارالحکومت میں 12 ربیع الاول کے جلوسوں اور مذہبی اجتماعات کے لیے سکیورٹی، ٹریفک اور صفائی کے خصوصی انتظامات کیے گئے ہیں۔ ضلعی انتظامیہ نے علما، پولیس اور جلوس منتظمین کے ساتھ اجلاس میں روٹس، سکیورٹی اور ٹریفک پلان کا جائزہ لیا تھا۔
انتظامیہ کے مطابق مذہبی اجتماعات کے دوران شہریوں کی سہولت اور سکیورٹی کو ترجیح دی جا رہی ہے، جبکہ مختلف مکاتبِ فکر کے علما نے امن، مذہبی ہم آہنگی اور نظم و ضبط برقرار رکھنے میں تعاون کی یقین دہانی کرائی ہے۔
سیرتِ نبوی ﷺ سے رہنمائی
12 ربیع الاول کی مناسبت سے منعقد ہونے والی تقریبات میں سیرتِ نبوی ﷺ کے مختلف پہلوؤں، بالخصوص عدل، رحم، مساوات، اخوت، برداشت اور انسانیت سے حسنِ سلوک کو اجاگر کیا جا رہا ہے۔
ملک بھر میں عقیدت مند اس مبارک موقع پر نبی کریم ﷺ کی تعلیمات پر عمل پیرا ہونے اور معاشرے میں امن، بھائی چارے اور باہمی احترام کو فروغ دینے کے عزم کا اظہار کر رہے ہیں۔
