خیبرپختونخوا کے مختلف علاقوں میں فورسز کی 2 الگ الگ کارروائیوں میں بھارتی اسپانسرڈ فتنہ الخوارج سے تعلق رکھنے والے 9 خوارج ہلاک ہو گئے۔
پاک فوج کے شعبہ تعلقات عامہ (آئی ایس پی آر) کے مطابق خوارج کی موجودگی کی خفیہ اطلاع پر سیکیورٹی فورسز نے ٹانک میں 5 دسمبر کو آپریشن کیا، آپریشن کے دوران فورسز نے خوارج کے ٹھکانے کو مؤثر انداز میں نشانہ بنایا۔
ٹانک میں دوران آپریشن فائرنگ کے تبادلے سے 7 خوارج ہلاک ہوئے۔ آئی ایس پی آر کے مطابق لکی مروت میں بھی سیکیورٹی فورسز نے انٹیلی جنس بیسڈ آپریشن کیا جس میں 2 خوارج ہلاک ہوئے۔
ہلاک ہونے والے بھارتی اسپانسرڈ خوارج سے اسلحہ اور گولہ بارود بھی برآمد ہوا، ہلاک خوارج دہشت گردانہ کارروائیوں اور شہریوں کی ٹارگٹ کلنگ میں ملوث تھے۔
آئی ایس پی آر کے مطابق دیگر بھارتی اسپانسرڈ خوارج کے خاتمے کیلئے سرچ اور کلیئرنس آپریشنز جاری ہے، فورسز اور قانون نافذ کرنے والے اداروں کی دہشتگردی کیخلاف مہم پوری قوت سے جاری رہے گی۔