بھارتی فوج کے اہلکاروں نے مراعات اور بنیادی ضروریات کی عدم فراہمی پر احتجاج شروع کر دیا ہے۔ بھارتی ریاست بہار کے مختلف شہروں خصوصاً پٹنہ میں فوجیوں نے سڑکوں پر نکل کر حکومت کے خلاف نعرے بازی کی اور مطالبات پورے نہ ہونے کی صورت میں احتجاج پورے بھارت میں پھیلانے کی دھمکی دی۔
فوجیوں کا کہنا تھا کہ وہ مودی سرکار اور ریاستی حکام کو کئی بار اپنی مشکلات سے آگاہ کر چکے ہیں۔ انہوں نے بارہا درخواستیں دی ہیں کہ ان کی رہائش، تنخواہوں، ریٹائرمنٹ کے بعد فوائد اور دیگر ضروریات کا خیال رکھا جائے، لیکن حکومتی سطح پر ان مطالبات کو مسلسل نظر انداز کیا جا رہا ہے، جس کے بعد وہ مجبوراً احتجاج پر اُتر آئے ہیں۔
نیشنل سیکیورٹی ایکسپرٹ سید محمد علی نے اس صورتحال پر تبصرہ کرتے ہوئے تین بنیادی وجوہات کی نشاندہی کی جو بھارتی فوج میں بڑھتے ہوئے اضطراب کا باعث بن رہی ہیں۔ ان کے مطابق پہلا مسئلہ یہ ہے کہ فوج کا مورال یعنی حوصلہ شدید طور پر متاثر ہوا ہے کیونکہ فوج کو قومی دفاع کے بجائے سیاسی مقاصد کے لیے استعمال کیا جا رہا ہے۔
انہوں نے کہا کہ دوسرا اہم مسئلہ یہ ہے کہ کشمیر میں ظلم و زیادتی، اقلیتوں کے ساتھ ناروا سلوک، اور پاکستان مخالف کارروائیاں نہ صرف بھارت میں بلکہ فوج کے اندر اقلیتوں سے تعلق رکھنے والے اہلکاروں کے جذبات کو مجروح کرتی ہیں۔ اس کا نتیجہ یہ ہے کہ فوج اندر سے تقسیم کا شکار ہو رہی ہے۔
تیسری بڑی وجہ، ان کے مطابق، یہ ہے کہ جو اہلکار آپریشنز میں مارے جاتے ہیں یا قربانیاں دیتے ہیں، ان کی خدمات کو حکومت یا فوجی قیادت کی طرف سے تسلیم نہیں کیا جاتا۔ ان کی شہادتیں محض سیاسی مقاصد کے لیے استعمال ہوتی ہیں اور کوئی سنجیدہ اعتراف نہیں کیا جاتا۔
اس رویے نے بھارتی افواج میں نہ صرف بے اعتمادی پیدا کی ہے بلکہ کئی اہلکاروں کو یہ احساس دلایا ہے کہ وہ ملک کے دفاع کے بجائے سیاسی ایجنڈے کا حصہ بن چکے ہیں۔ یہی وہ محرکات ہیں جن کی بنیاد پر بھارتی فوجی اب احتجاج پر مجبور ہو چکے ہیں۔