کوالالمپور: وزیراعظم پاکستان شہباز شریف دو روزہ سرکاری دورے پر ملائیشیا پہنچ گئے۔ ملائیشیا پہنچنے پر وزیرِ اعظم کا شاندار استقبال کیا گیا۔ اس دورے کو دونوں ممالک کے مابین تجارتی شراکت دار کے لیے انتہائی اہم سمجھا جارہا ہے۔
سرکاری عمارتیں پاکستانی پرچموں سے مزین
شہباز شریف کی بنگا رایا انٹرنیشنل ایئرپورٹ پہنچنے پر ملائیشیا کے وزیر اطلاعات اور پاکستانی ہائی کمشنر سید احسن رضا شاہ نے وزیر اعظم کو خوش آمدید کہا اس دوران کوالالمپور کی شاہراہیں پاکستانی و ملائیشین پرچموں سے سجی ہوئی تھیں۔
وزیرِ اعظم انور ابراہیم سے ملاقات
وزیراعظم شہباز شریف نے اپنے ملائیشیائی ہم منصب انور ابراہیم سے اہم ملاقات کی۔ ملاقات کے بعد دونوں رہنماؤں نے مشترکہ پریس کانفرنس سے بھی کی۔ پریس کانفرنس میں شہباز شریف نے ملائیشیا کو اپنا دوسرا گھر قرار دیتے ہوئے کہا کہ ملائیشیائی حکومت نے عالمی حالات کو مدنظر رکھتے ہوئے گزشتہ چند سال میں اہم کامیابیاں حاصل کی ہیں۔
گوشت کی برآمد پر اہم معاہدہ
وزیرِ اعظم کے دورے کے دوران دونوں ممالک کے مابین متعدد معاہدے کیے گئے جن میں سرِفہرست معاہدہ ملائیشیا پاکستان سے 200 ملین ڈالر کا گوشت درآمد کرے گا۔ وزیراعظم شہباز شریف کا کہنا تھا کہ حکومتِ پاکستان معیار کو یقینی بنائے گی جبکہ مستقبل میں زیرِ نظر معاہدے میں اضافے کے بھی امکانات ہیں۔
ملائیشیائی وزیرِ اعظم انور ابراہیم نے مذکورہ معاہدے کو اہم پیش رفت قرار دیا۔
فکری وابستگی
ملائیشیائی وزیراعظم کا کہنا تھا ہماری حکومت نے علامہ اقبال کی کتب جاوید نامہ اور خطباتِ اقبال کو اردو زبان میں ترجمہ کروایا جس سے دونوں ممالک کے فکری و نظریاتی رشتے مزید مظبوط ہونگے۔
دونوں ممالک کے مابین متعدد معاہدے کیے گئے
دونوں ممالک نے تجارت، حلال انڈسٹری، سرمایہ کاری، تعلیم اور عوامی روابط کے شعبوں میں باہمی تعاون کے معاہدوں پر دستخط کیے۔
وزیراعظم شہباز شریف کے ہمراہ نائب وزیراعظم و وزیر خارجہ اسحاق ڈار، وفاقی وزیر اطلاعات عطا تارڑ اور معاونِ خصوصی طارق فاطمی بھی موجود تھے۔
دیکھیں: وزیر اعظم شہباز شریف وفد کے ہمراہ 3 روزہ سرکاری دورے پر ملائیشیا روانہ ہوگئے