جوہری تعمیرات جاری رہیں تو قیامت برپا کر دیں گے، ٹرمپ کی ایران کو ایک بار پھر دھمکی

امریکی صدر ڈونلڈ ٹرمپ نے ایران کو خبردار کیا ہے کہ اگر وہ جوہری تعمیرات جاری رکھتا ہے تو اس پر سخت کارروائی کی جائے گی۔ یہ بات انہوں نے فلوریڈا میں اسرائیلی وزیراعظم نیتن یاہو سے ملاقات کے بعد صحافیوں سے گفتگو کرتے ہوئے کہی۔

صدر ٹرمپ نے کہا کہ اطلاعات ہیں ایران دوبارہ جوہری تنصیبات تعمیر کرنے کی کوشش کر رہا ہے اور اگر ایسا ہوا تو امریکا فوری کارروائی کرے گا۔ انہوں نے مزید کہا کہ ایران کو کسی معاہدے پر آ جانا چاہیے تھا اور اگر اپنا جوہری پروگرام دوبارہ بحال کرنے کی کوشش کرے تو اسے تباہ کرنا لازمی ہوگا۔

اسرائیل کے ساتھ تعلقات اور غزہ منصوبہ

امریکی صدر ٹرمپ نے کہا ہے کہ نیتن یاہو کے ساتھ پانچ اہم امور پر بات چیت ہوئی۔ انہوں نے کہا کہ غزہ منصوبے کا دوسرا مرحلہ جلد شروع ہونے کی توقع ہے اور غزہ کی تعمیر نو بھی آئندہ دنوں میں شروع ہوگی۔ صدر ٹرمپ نے واضح کیا کہ امریکا اسرائیل کا ساتھ دیتا رہے گا۔

یوکرین اور سیکیورٹی ضمانتیں
صدر ٹرمپ نے روسی صدر ولادیمیر پیوٹن کی رہائش گاہ پر یوکرینی حملے پر ردعمل ظاہر کرتے ہوئے کہا کہ یہ خبر سن کر انہیں شدید دکھ ہو۔ انہوں نے کہا کہ یوکرین میں امن کے قیام کے لیے کئی پیچیدہ مسائل درپیش ہیں۔

یوکرین کے صدر ولودیمیر زیلنسکی نے امریکا سے 30 سے 50 سال تک طویل المدتی سیکیورٹی ضمانتیں طلب کی ہیں، جس پر صدر ٹرمپ نے کہا کہ وہ اس تجویز پر سنجیدگی سے غور کریں گے۔

دیکھیں: ایران میں ریال کی تاریخی گراوٹ پر ملک گیر احتجاجی مظاہرے