وزیرِاعظم شہباز شریف نے حکومت اور پاکستان تحریکِ انصاف کے مابین مذاکرات کے آغاز کے لیے گرین سگنل دے دیا ہے، جس سے سیاسی تعطل کے خاتمے کی امید پیدا ہو گئی ہے۔
ذرائع کے مطابق وزیراعظم نے مذاکرات کے معاملے پر اسپیکر قومی اسمبلی سردار ایاز صادق کو آمادگی سے آگاہ کر دیا ہے۔ حکومتی وفد اسپیکر کی درخواست پر بات چیت کے لیے تیار ہے، تاہم حکومت نے واضح کیا ہے کہ مذاکرات صرف پی ٹی آئی کے منتخب پارلیمانی نمائندوں سے کیے جائیں گے اور غیر منتخب افراد سے کوئی رابطہ نہیں ہوگا۔
دوسری جانب اسپیکر آفس کے ذرائع کا کہنا ہے کہ تاحال مذاکرات کے لیے تحریکِ انصاف کی جانب سے باضابطہ رابطہ نہیں کیا گیا۔ سردار ایاز صادق نے پارلیمانی کمیٹی بدستور برقرار رکھی ہوئی ہے اور اپوزیشن کی رضامندی کی صورت میں فوری طور پر کمیٹی کا اجلاس طلب کیا جائے گا۔
پارلیمانی ذرائع کے مطابق اسپیکر کی پیشکش کے باوجود اب تک اپوزیشن نے کوئی رابطہ نہیں کیا، تاہم پی ٹی آئی کو اسپیکر کے چیمبر میں آنے کی دعوت دی جا چکی ہے۔
واضح رہے کہ تحریکِ انصاف کی اسپیکر سے آخری ملاقات محمود خان اچکزئی کو اپوزیشن لیڈر نامزد کرنے کے معاملے پر ہوئی تھی۔ سیاسی مبصرین کے مطابق اگر مذاکرات کا عمل شروع ہوتا ہے تو یہ پارلیمانی ماحول میں بہتری اور سیاسی کشیدگی میں کمی کی جانب اہم پیش رفت ہو سکتی ہے۔
دیکھیں: پاکستان تحریک انصاف کا 8 فروری کو ملک بھر میں شٹر ڈاؤن ہڑتال کا اعلان
