پاک فوج کے شعبہ تعلقات عامہ (آئی ایس پی آر) کے مطابق پاک بحریہ نے شمالی بحیرۂ عرب میں ایک جامع بحری مشق کے ذریعے اپنی آپریشنل تیاری اور جنگی صلاحیتوں کا بھرپور مظاہرہ کیا۔ مشق میں روایتی اور بغیر پائلٹ جنگی صلاحیتوں کو جدید بحری جنگ کے تقاضوں کے مطابق پیش کیا گیا۔
آئی ایس پی آر کے بیان کے مطابق مشق کے دوران عمودی لانچنگ سسٹم سے ایل وائے-80(این) زمین سے فضا میں مار کرنے والے میزائل کا طویل فاصلے پر کامیاب لائیو فائر کیا گیا۔ میزائل نے فضائی ہدف کو کامیابی سے نشانہ بنا کر تباہ کیا، جس سے پاک بحریہ کے جدید فضائی دفاعی نظام کی طویل فاصلے تک مؤثر صلاحیتوں کی توثیق ہوئی۔
مشق میں لوئٹرنگ میونیشن کے ذریعے سطحِ آب پر موجود اہداف کو بھی کامیابی سے نشانہ بنایا گیا، جس سے پاک بحریہ کی درست اور مؤثر حملہ آور صلاحیتوں کا مظاہرہ ہوا۔ آئی ایس پی آر کے مطابق لوئٹرنگ میونیشن نے اہداف کو مکمل طور پر تباہ کر کے جدید بحری جنگ میں اپنی افادیت ثابت کی۔
اس کے علاوہ بغیر پائلٹ سطحی بحری جہاز کے کھلے سمندر میں کامیاب آزمائشی تجربات بھی کیے گئے، جو خودکار بحری ٹیکنالوجی میں ایک اہم پیش رفت قرار دی جا رہی ہے۔ آزمائشوں کے دوران اس پلیٹ فارم کی تیز رفتار کارکردگی، غیر معمولی پھرتی، درست نیویگیشن اور خراب موسم میں استحکام جیسی صلاحیتوں کا کامیاب مظاہرہ کیا گیا۔ یو ایس وی کو کم خطرے اور زیادہ اثر رکھنے والا ایک مؤثر اور اسٹیلتھ بحری نظام قرار دیا گیا ہے۔
کمانڈر پاکستان فلیٹ نے مشق کا مشاہدہ کیا، جس میں پاک بحریہ کی جدید جنگی نظاموں کے مؤثر استعمال کی صلاحیت نمایاں طور پر سامنے آئی۔
چیف آف دی نیول اسٹاف ایڈمرل نوید اشرف، نشانِ امتیاز (ملٹری)، تمغۂ بسالت نے افسران اور جوانوں کی پیشہ ورانہ مہارت اور آپریشنل صلاحیتوں کو سراہا۔ انہوں نے اس عزم کا اعادہ کیا کہ پاک بحریہ ہر صورت میں پاکستان کے سمندری دفاع اور قومی بحری مفادات کے تحفظ کو یقینی بنائے گی۔
دیکھیں: افغانستان سے امریکی فوج کے انخلا پر ٹرمپ کی ایک بار پھر تنقید، فیصلے کو ”غیر دانشمندانہ” قرار دے دیا
