افغانستان سے امریکی فوج کے انخلا پر ٹرمپ کی ایک بار پھر تنقید، فیصلے کو ”غیر دانشمندانہ” قرار دے دیا

امریکی صدر ڈونلڈ ٹرمپ نے ایک بار پھر افغانستان سے امریکی افواج کے انخلا کے دوران فوجی سازوسامان چھوڑے جانے کے فیصلے پر شدید تنقید کرتے ہوئے کہا ہے کہ اس اقدام نے امریکہ کی عالمی ساکھ کو بری طرح متاثر کیا۔ فاکس نیوز کو دیے گئے ایک انٹرویو میں، وینزویلا کے خلاف حالیہ امریکی کارروائی کے تناظر میں گفتگو کرتے ہوئے، ٹرمپ نے افغانستان سے انخلا کو کمزوری کی علامت قرار دیا۔

ٹرمپ نے کہا کہ اپنی پہلی مدتِ صدارت کے دوران انہوں نے امریکی فوج کو دوبارہ مضبوط بنایا، تاہم بعد ازاں اس طاقت کا ایک بڑا حصہ ’’انتہائی غیر دانشمندانہ‘‘ انداز میں افغانستان میں چھوڑ دیا گیا۔ ان کے بقول، بظاہر یہ تھوڑا سا لگتا ہے، مگر حقیقت میں یہ بھاری مقدار میں جدید فوجی سازوسامان تھا جو طالبان کے ہاتھ لگا۔

انہوں نے افغانستان سے امریکی انخلا کا موازنہ وینزویلا کے خلاف حالیہ آپریشن سے کرتے ہوئے کہا کہ اس وقت امریکا دنیا بھر میں مذاق بن گیا تھا۔ ٹرمپ کا کہنا تھا، ’’افغانستان کے معاملے میں ہم دنیا کے لیے ہنسی کا سامان بن گئے تھے، لیکن اب ایسا نہیں ہے۔ اب امریکا ایک بار پھر ایک باوقار اور طاقتور ملک کے طور پر دیکھا جا رہا ہے۔‘‘

امریکی صدر کے مطابق افغانستان سے انخلا کے طریقہ کار نے امریکہ کو عالمی سطح پر کمزور ظاہر کیا، جبکہ حالیہ کارروائیاں یہ ثابت کرتی ہیں کہ امریکہ دوبارہ اپنی عسکری طاقت اور اثر و رسوخ منوانے کی پوزیشن میں آ چکا ہے۔

دیکھیں: افغان سرحد بند ہونے سے پاکستان کی سکیورٹی صورتحال بہتر، دہشت گردی کے واقعات میں 17 فیصد کمی