اقوامِ متحدہ میں پاکستانی مندوب عاصم افتخار کا سماجی تحفظ کے عالمی نظام پر زور، ترکیہ کے ‘دارالعجزه’ ماڈل کی تعریف

اقوامِ متحدہ میں پاکستان کے مستقل مشن نے 2 فروری 2026 کو منعقدہ سائیڈ ایونٹ “سماجی یکجہتی پر مبنی جامع طویل المدتی نگہداشت کا نظام” کے دوران پاکستان کے مستقل مندوب، عاصم افتخار کی جانب سے دیے گئے بیان کی تفصیلات شیئر کیں۔ اس موقع پر ترکی کے 130 سالہ فلاحی ادارے دارالعجزہ کو طویل المدتی نگہداشت کے ایک کامیاب اور قابلِ تقلید ماڈل کے طور پر پیش کیا گیا۔

عاصم افتخار نے اس اہم سائیڈ ایونٹ کے انعقاد اور دارالعجزہ ماڈل کی مؤثر پیشکش پر حکومتِ ترکی کا شکریہ ادا کیا، جبکہ قطر، ترکی اور آذربائیجان کی قیادت اور سماجی تحفظ کے شعبے میں خدمات کو بھی سراہا۔

بیان میں کہا گیا کہ دارالعجزہ ایک ایسا منفرد ماڈل ہے جو ریاستی ذمہ داری، خیرات، اور کمیونٹی شمولیت کو یکجا کرتا ہے، جو سماجی یکجہتی پر مبنی طویل المدتی نگہداشت کی عملی مثال ہے۔ اس تناظر میں پاکستان کے تجربے کا حوالہ دیتے ہوئے بے نظیر انکم سپورٹ پروگرام اور پاکستان بیت المال کو ہم آہنگ اور مؤثر سماجی تحفظ کے قومی اداروں کے طور پر اجاگر کیا گیا۔

پاکستان نے اس امر پر زور دیا کہ پاکستان میں ادارہ جاتی سماجی تحفظ کے ساتھ ساتھ فلاحی روایت، رضاکارانہ خدمات، ایدھی فاؤنڈیشن اور نجی شعبے کی کارپوریٹ سماجی ذمہ داری کی سرگرمیاں معاشرتی نگہداشت کے نظام کو مضبوط بناتی ہیں۔

بیان کے اختتام پر اس بات پر زور دیا گیا کہ سماجی یکجہتی پر مبنی نگہداشت کے ایسے ماڈلز کو عالمی پالیسی سطح پر فروغ دیا جانا چاہیے، جبکہ جامع اور پائیدار طویل المدتی نگہداشت کے نظام کے قیام کے لیے ساؤتھ ساؤتھ کوپریشن کو مزید مضبوط بنانے کی ضرورت ہے۔

دیکھیے: اقوامِ متحدہ میں پاکستان کا دوٹوک مؤقف، سرحد پار حملے اب ناقابلِ برداشت ہوں گے