ڈیرہ اسماعیل خان کے علاقے تھانہ پروآ میں واقع نیشنل بینک پر 20 سے 25 مسلح افراد نے حملہ کر دیا، تاہم پولیس کی فوری اور مؤثر کاروائی کے نتیجے میں یہ حملہ ناکام ہو گیا۔ پولیس ذرائع کے مطابق حملہ آوروں نے بینک میں لوٹ مار کی کوشش کی، جس پر پولیس اور مسلح افراد کے درمیان شدید فائرنگ کا تبادلہ ہوا۔
فائرنگ کے دوران چار پولیس اہلکار زخمی ہو گئے، جنہیں فوری طور پر قریبی ہسپتال منتقل کیا گیا۔ پولیس حکام کے مطابق زخمی اہلکاروں کی حالت خطرے سے باہر ہے۔
ڈی پی او ڈیرہ اسماعیل خان سجاد احمد صاحب زادہ کو اطلاع ملتے ہی موقع پر پہنچ گئے، جبکہ ایس پی سٹی سرکل اور دیگر پولیس اہلکاروں کی کثیر تعداد بھی جائے وقوعہ پر موجود رہی۔ ڈیرہ پولیس کے ترجمان کے مطابق پولیس کی بروقت کارروائی کی وجہ سے حملہ آور اپنے مقصد میں کامیاب نہ ہو سکے اور اندھیرے کا فائدہ اٹھا کر فرار ہو گئے۔
واقعے کے بعد علاقے میں گھیراؤ کرتے ہوئے تلاشی آپریشن شروع کر دیا گیا ہے، جبکہ شہر کے داخلی و خارجی راستوں پر سخت ناکہ بندی بھی کی گئی ہے۔ پولیس کا کہنا ہے کہ صورتحال پر مکمل کنٹرول ہے اور حملہ آوروں کی گرفتاری کے لیے کارروائیاں تیز کر دی گئی ہیں۔
دیکھیے: سکیورٹی فورسز کا نوشکی میں کامیاب آپریشن، سات دہشت گرد ہلاک