ازبکستان کے صدر شوکت مرزیا یوف کے دورۂ پاکستان کے بعد دونوں ممالک نے اپنے تعلقات کو نئی بلندیوں تک پہنچانے اور جامع شراکت داری کو مزید مضبوط بنانے کے لیے ایک مشترکہ اعلامیہ جاری کیا ہے۔
اعلامیے کے مطابق وزیراعظم شہباز شریف اور صدر شوکت مرزیا یوف نے اعلیٰ سطحی اسٹریٹجک کوآپریشن کونسل کے پہلے اجلاس کی مشترکہ صدارت کرتے ہوئے دو طرفہ تعاون کے تمام شعبوں میں پیشرفت پر اتفاق کیا۔ انہوں نے 2029 تک باہمی تجارت کو 2 ارب ڈالر تک بڑھانے اور ازبکستان۔ افغانستان۔ پاکستان ریلوے منصوبے کی بروقت تکمیل کے عزم کی تجدید کی۔
اعلامیے میں اقتصادی اور تجارتی شراکت کو نئی توانائی دینے، صنعتی اور تعلیمی اشتراک کو وسعت دینے، نیز ثقافتی، سیاحتی اور میڈیا تعاون کو مضبوط بنانے پر زور دیا گیا۔ دونوں رہنماؤں نے علاقائی سلامتی کے تحفظ، دہشت گردی، انتہا پسندی اور منشیات کی اسمگلنگ کے خلاف مشترکہ اقدامات کے لیے بھرپور عزم کا اظہار کیا۔
افغانستان میں پائیدار امن کو خطے کی استحکام اور UAP منصوبے کی کامیابی کے لیے لازمی قرار دیتے ہوئے، دونوں ممالک نے افغان حکومت سے دہشت گرد تنظیموں کے خاتمے کے لیے فوری اور مؤثر اقدامات کا مطالبہ کیا۔
پاکستان اور ازبکستان نے افغان طالبان سے اپیل کی ہے کہ وہ افغانستان میں موجود تمام دہشت گرد تنظیموں کو فوری اور مؤثر اقدامات کے ذریعے ختم کریں اور افغان سرزمین کو کسی بھی ملک کے خلاف دہشت گردی کے لیے استعمال ہونے سے روکیں۔
صدر شوکت مرزیا یوف نے پاکستانی قیادت اور عوام کی پرتپاک میزبانی پر تشکر کا اظہار کیا اور وزیراعظم شہباز شریف کو ازبکستان کے دورے کی دعوت دی، جسے وزیراعظم نے قبول کر لیا۔
یہ دورہ اس وقت ہوا ہے جب ایک روز قبل قازقستان کے صدر بھی اسلام آباد کے سرکاری دورے پر تھے، جو پاکستان کی وسطی ایشیائی ریاستوں کے ساتھ گہرے تعلقات استوار کرنے کی حکمت عملی میں ایک اہم موڑ کی نشاندہی کرتا ہے۔