ضلع باجوڑ کے علاقے ملنگی میں قائم ایک مدرسے میں خودکش دھماکہ ہوا ہے جس کے نتیجے میں سیکیورٹی فورسز اور پولیس کو نشانہ بنایا گیا۔ ذرائع کے مطابق مدرسے میں سیکیورٹی فورسز اور پولیس کی ایک چوکی قائم تھی جب حملہ آور نے خود کو دھماکے سے اُڑا لیا۔
دھماکے کی شدت کے باعث مدرسے کی چھت منہدم ہو گئی جبکہ اردگرد کے مکانات کو بھی نقصان پہنچا۔ اطلاعات کے مطابق حملے میں سیکیورٹی اہلکاروں نے جامِ شہادت نوش کیا، جبکہ شہری آبادی بھی متاثر ہوئی اور چند عام شہری جاں بحق ہوئے۔
واقعے کے فوراً بعد سیکیورٹی فورسز اور امدادی ٹیمیں موقع پر پہنچ گئیں اور علاقے کو گھیرے میں لے کر سرچ کارروائی شروع کر دی گئی۔ زخمیوں کو قریبی طبی مراکز منتقل کیا گیا جہاں انہیں طبی امداد فراہم کی جا رہی ہے۔
حکام کے مطابق واقعے کی نوعیت اور محرکات جاننے کے لیے تحقیقات جاری ہیں۔ علاقے میں سیکیورٹی سخت کر دی گئی ہے جبکہ قانون نافذ کرنے والے ادارے حملے کے ذمہ دار عناصر کی تلاش میں مصروف ہیں۔
سیاسی و سماجی حلقوں نے اس حملے کی مذمت کرتے ہوئے اسے امن کو سبوتاژ کرنے کی کوشش قرار دیا ہے اور مطالبہ کیا ہے کہ ذمہ داروں کو کیفرِ کردار تک پہنچایا جائے۔
دیکھیے: فساد فی الارض: معصوم جانوں کے خلاف تشدد اسلام کی تعلیمات کے منافی
