باجوڑ میں ایف سی و پولیس چیک پوسٹ پر خودکش دھماکہ، تیرہ افراد شہید ہو گئے

ضلع باجوڑ کے تحصیل ماموند کے علاقے ملنگی میں واقع فرنٹیئر کور (ایف سی) اور پولیس کی مشترکہ چیک پوسٹ پر گزشتہ رات خودکش حملہ ہوا، جس میں اہلکاروں اور شہریوں سمیت 13 افراد شہید اور زخمی ہو گئے۔

دھماکہ اس قدر شدید تھا کہ اس کی آواز دور دور تک سنائی دی، چیک پوسٹ کی عمارت مکمل طور پر زمین بوس ہو گئی اور قریبی گھروں کے شیشے اور چھتیں ٹوٹ گئیں۔ ابتدائی اطلاعات کے مطابق چیک پوسٹ میں موجود 11 اہلکار شہید اور 2 زخمی ہوئے جبکہ 5 اہلکار لاپتہ ہیں۔ قریبی گھروں میں بھی 2 بچے شہید اور متعدد افراد زخمی ہوئے۔

شہداء میں نائب صوبیدار عزیر، حوالدار حضرت بلال، سپاہی قمر عباس، سپاہی رشید گل، لانس نائیک شاہد انور اور پولیس اہلکار شمروز شامل ہیں۔ زخمیوں میں سپاہی اشفاق اور ذیشان شامل ہیں، جبکہ لاپتہ اہلکاروں میں سپاہی رضوان، محمدی گل، گل کبیر، قادر اللہ اور مرسلین شامل ہیں۔

واقعہ کے بعد ضلعی انتظامیہ، ریسکیو اور مقامی افراد نے فوری امدادی کارروائیاں کرتے ہوئے شہداء اور زخمیوں کو ہسپتال منتقل کیا۔ تاہم زخمیوں کو منتقل کرتے ہوئے ایمبولینس پر نامعلوم افراد نے حملہ کیا، جس کے نتیجے میں مزید دو افراد زخمی ہوئے۔

یہ چیک پوسٹ مدرسہ سال 2010 سے سکیورٹی فورسز کے استعمال میں تھی۔ دھماکے کے بعد ماموند جانے والی مین شاہراہ مکمل طور پر بند کر دی گئی ہے اور باجوڑ کی فضاء غم و اندوہ میں ڈوبی ہوئی ہے۔ سکیورٹی فورسز علاقے میں اضافی چوکیاں قائم کر کے مزید حفاظتی اقدامات کر رہی ہیں۔

دیکھیے: باجوڑ کے قریب ایک مدرسے میں خودکش دھماکہ