وفاقی وزیر اطلاعات عطا اللہ تارڑ نے کہا ہے کہ پاکستان بورڈ آف پیس میں اپنی شرکت کے ذریعے فلسطینی عوام کے دیرینہ حقوق اور ان کے منصفانہ مؤقف کو عالمی سطح پر اجاگر کرنے میں نمایاں کامیابی حاصل کر رہا ہے۔ انہہوں نے واضح انداز میں کہا کہ یہ فورم پاکستان کو بین الاقوامی فیصلہ سازی کے عمل میں ایک مؤثر نمائندگی فراہم کرتا ہے، جو ملک کے وسیع تر مفاد میں ہے۔
وزیر اطلاعات نے واضح کیا کہ بورڈ آف پیس میں پاکستان کی موجودگی اس امر کی ضمانت ہے کہ فلسطینیوں کی آزادی اور خود مختاری کی آواز کو عالمی ایوانوں میں دبنے نہیں دیا جائے گا۔ انہوں نے کہا کہ پاکستان کا اصولی مؤقف ہے کہ فلسطینی عوام کو اقوامِ متحدہ کی سلامتی کونسل کی قراردادوں کے عین مطابق ان کا بنیادی حقِ خودارادیت ملنا چاہیے، جس سے خطے میں پائیدار امن کی راہ ہموار ہو سکے۔
عطا اللہ تارڑ نے ایک آزاد اور خود مختار فلسطینی ریاست کے قیام کی ضرورت پر زور دیتے ہوئے اعادہ کیا کہ فلسطینیوں کو اپنی سرزمین پر مکمل اور غیر متزلزل حق حاصل ہے۔ ان کا مزید کہنا تھا کہ بورڈ آف پیس جیسے پلیٹ فارم پر پاکستان کی فعال شرکت اس بات کو یقینی بناتی ہے کہ فلسطینیوں کی ریاستی حیثیت اور ان کے انسانی حقوق کے حق میں پاکستان کا بیانیہ مضبوط اور مدلل انداز میں دنیا کے سامنے پیش کیا جاتا رہے۔
دیکھیے: احسن اقبال کا دورۂ ڈھاکہ: وزیراعظم سے ملاقات اور پاک۔ بنگلہ دوستی کا نیا باب