Skip to content 
اسلام آباد: پاکستانی اداکار حمزہ علی عباسی کی بہن ڈاکٹر فضیلہ عباسی مبینہ منی لانڈرنگ کیس میں نئی قانونی مشکلات کا شکار ہو گئی ہیں، جہاں عدالت نے ان کی عبوری ضمانت منسوخ کر دی ہے۔
رپورٹس کے مطابق اسلام آباد کی سیشن عدالت نے عبوری ضمانت ختم کرتے ہوئے کیس میں مزید قانونی کارروائی کی راہ ہموار کر دی، جس کے بعد تحقیقات میں تیزی آنے کا امکان ہے۔
ایف آئی آر کے مطابق ڈاکٹر فضیلہ عباسی کے 22 بینک اکاؤنٹس میں تقریباً 25 ارب روپے کی خطیر رقم جمع کرائی گئی، جسے بعد ازاں بیرون ملک، خصوصاً دبئی اور امریکا منتقل کیا گیا۔ حکام کے مطابق اس رقم کے ذرائع تاحال واضح نہیں ہو سکے۔
ذرائع کے مطابق اس کیس میں پہلے بھی پیش رفت ہوئی تھی اور اسلام آباد ہائی کورٹ نے ایک مرحلے پر کیس بند کر دیا تھا، تاہم ایف آئی اے کی اپیل منظور ہونے کے بعد تحقیقات دوبارہ شروع کی گئی اور معاملہ دوبارہ شدت اختیار کر گیا۔
ایف آئی اے حکام کا کہنا ہے کہ رقم کے ذرائع اور منتقلی کے حوالے سے مزید شواہد اکٹھے کیے جا رہے ہیں، جبکہ کیس میں مزید اہم انکشافات متوقع ہیں۔
دیکھئیے:ترکی میں بڑا کریک ڈاؤن، ہانڈے ارچل سمیت کئی معروف شخصیات منشیات کیس میں گرفتار
