برازیلیا: سوشل میڈیا پر شہرت حاصل کرنے کی دوڑ نے ایک برازیلین انفلوئنسر کو جیل پہنچا دیا، جہاں گلیمر ماڈل مونیکی فراگا کا مبینہ جعلی اغوا ڈرامہ بے نقاب ہو گیا۔
رپورٹس کے مطابق مونیکی فراگا نے گزشتہ سال اپریل میں ایک ویڈیو شیئر کی تھی جس میں وہ روتے ہوئے دعویٰ کر رہی تھیں کہ انہیں اور ان کے شوہر کو مسلح افراد نے اغوا کر لیا اور جنگل میں یرغمال بنا کر تاوان کا مطالبہ کیا۔
انہوں نے ویڈیو میں بتایا تھا کہ اغوا کاروں نے ان کے شوہر پر تشدد کیا اور انہیں جان سے مارنے کی دھمکیاں دیں، تاہم پولیس تحقیقات کے دوران یہ پوری کہانی مشکوک ثابت ہوئی۔
تفتیشی افسر کلے اینڈرسن کے مطابق شواہد سے واضح ہوا کہ یہ اغوا دراصل ایک منصوبہ بند ڈرامہ تھا، جس کا مقصد سوشل میڈیا پر شہرت اور فالوورز میں اضافہ کرنا تھا۔
پولیس نے “اسموک اسکرین آف لائکس” نامی آپریشن کے تحت کارروائی کرتے ہوئے مونیکی فراگا کو گرفتار کر لیا جبکہ اس کیس میں مزید افراد کے ملوث ہونے کا بھی انکشاف ہوا ہے۔
حیران کن طور پر تحقیقات میں یہ بھی سامنے آیا کہ مونیکی کے شوہر اس منصوبے سے بے خبر تھے اور انہیں واقعی اغوا کر کے تشدد کا نشانہ بنایا گیا۔
پولیس کے مطابق ملزمہ پر بلیک میلنگ، عدالتی کارروائی میں رکاوٹ ڈالنے اور ریاستی وسائل ضائع کرنے جیسے سنگین الزامات عائد کیے گئے ہیں، جبکہ وہ اب بھی اپنے مؤقف پر قائم ہیں کہ اغوا حقیقی تھا۔
دیکھئیے:منی لانڈرنگ کیس میں حمزہ علی عباسی کی بہن کی عبوری ضمانت منسوخ