کوئٹہ: وزیراعلیٰ بلوچستان سرفراز بگٹی نے صوبے میں نئے اضلاع بنانے کا اعلان کرتے ہوئے پشین کے علاقے برشور کو ضلع کا درجہ دے دیا ہے۔
برشور میں عوامی جلسے سے خطاب کرتے ہوئے وزیراعلیٰ نے کہا کہ نئے ضلع کے قیام سے علاقے میں ترقی کا نیا دور شروع ہوگا اور سرکاری اداروں کو مضبوط بنایا جائے گا تاکہ عوام کو بہتر سہولیات فراہم کی جا سکیں۔
انہوں نے اعلان کیا کہ بند اسکولوں کو فوری طور پر کھولا جائے گا اور صحت کی سہولیات کو بھی بہتر بنایا جائے گا، جبکہ غفلت برتنے والے افسران کے خلاف کارروائی کی جائے گی۔
سرفراز بگٹی کا کہنا تھا کہ وہ بلوچستان کے ہر علاقے میں جا کر عوام کے مسائل سنیں گے اور ان کے حل کیلئے اقدامات جاری رکھیں گے۔
افغانستان کے حوالے سے انہوں نے کہا کہ پاکستان نے دہائیوں تک افغان عوام کی خدمت کی، تاہم اس کا مناسب جواب نہیں ملا، اس کے باوجود افغان عوام کو برادر سمجھتے ہیں۔
وزیراعلیٰ نے ملکی سلامتی پر اعتماد کا اظہار کرتے ہوئے کہا کہ فیلڈ مارشل جنرل عاصم منیر کی قیادت میں پاکستان کا دفاع مضبوط ہاتھوں میں ہے اور کوئی دشمن ملک کی ایک انچ زمین کو نقصان نہیں پہنچا سکتا۔
انہوں نے اس موقع پر ایران پر حملوں کے معاملے پر اسرائیل کی بھی سخت مذمت کی
دیکھئیے:پاکستان نے مشرق وسطیٰ میں کشیدگی کم کرنے کیلئے پرزور ٹیلیفونک سفارتکاری کی: امریکی اخبار