لاہور: پاکستان سپر لیگ (پی ایس ایل) 11 کے دوسرے میچ میں کراچی کنگز نے کوئٹہ گلیڈی ایٹرز کو سنسنی خیز مقابلے کے بعد 14 رنز سے شکست دے دی۔
قذافی اسٹیڈیم لاہور میں کھیلے گئے میچ میں کوئٹہ گلیڈی ایٹرز نے ٹاس جیت کر پہلے فیلڈنگ کا فیصلہ کیا۔ کراچی کنگز نے مقررہ 20 اوورز میں 7 وکٹوں کے نقصان پر 181 رنز بنائے۔
کراچی کی جانب سے انگلش آل راؤنڈر معین علی نے شاندار بیٹنگ کا مظاہرہ کرتے ہوئے 29 گیندوں پر 48 رنز ناٹ آؤٹ بنائے، جس میں 4 چوکے اور 3 چھکے شامل تھے۔ کپتان ڈیوڈ وارنر نے 35 جبکہ مرزا سعد بیگ نے 30 رنز کی اہم اننگز کھیلی۔ کوئٹہ کی جانب سے احمد دانیال نے 3 اور الزاری جوزف نے 2 وکٹیں حاصل کیں۔
182 رنز کے ہدف کے تعاقب میں کوئٹہ گلیڈی ایٹرز نے مضبوط آغاز کیا اور اوپنرز سعود شکیل اور شامل حسین نے 79 رنز کی شراکت قائم کی۔ شامل حسین نے 24 گیندوں پر 52 رنز کی جارحانہ اننگز کھیلی جبکہ سعود شکیل نے 33 رنز بنائے۔
تاہم درمیانی اوورز میں کراچی کے بولرز نے میچ کا پانسہ پلٹ دیا۔ خصوصاً حسن علی نے شاندار بولنگ کرتے ہوئے 27 رنز کے عوض 4 وکٹیں حاصل کیں، جس کے باعث کوئٹہ کی ٹیم مقررہ 20 اوورز میں 7 وکٹوں کے نقصان پر 167 رنز ہی بنا سکی۔
کوئٹہ کی جانب سے رائلی روسو اور بین میکڈرموٹ نے 25،25 رنز بنائے، مگر ٹیم کو شکست سے نہ بچا سکے۔
دیکھئیے:پی ایس ایل 11 کا دھماکے دار آغاز، لاہور قلندرز نے حیدر آباد کنگزمین کو 69 رنز سے شکست دے دی