افغانستان فریڈم فرنٹ (اے ایف ایف) نے رمضان المبارک میں جنگ بندی کے بعد دوبارہ کاروائیاں شروع کر دی ہیں اور عید کے بعد اب تک کے دو حملوں میں طالبان کے ایک اہم کمانڈر سمیت 7 اہلکار ہلاک کر دیے ہیں، جن میں بدخشاں کے ضلع بہارک میں طالبان کی 219 ویں ڈویژن کے اہم کمانڈر رحمت اللہ گرباز بھی شامل ہیں۔
سورس کے مطابق پہلی کاروائی قندوز میں 26 مارچ کو پیش آئی، جہاں فریڈم فرنٹ نے طالبان کے گشتی دستوں اور رینجر گاڑیوں کو ہدف بنایا۔ کندوز اور خان آباد ہائی وے پر کی گئی کاروائی میں طالبان کے 2 اہلکار ہلاک اور ایک زخمی ہوا، اسی ہائی وے پر ایک دوسرے حملے میں ایک اور طالبان اہلکار ہلاک ہو گیا۔ دوسری کارروائی اتوار کے روز صوبہ بدخشاں کے ضلع بہارک کے علاقے قلاتک میں کی گئی، جہاں اے ایف ایف کے عسکریت پسندوں نے طالبان کی 219 ویں ڈویژن کی سرحدی رجمنٹ کے واچ ٹاور کو نشانہ بنایا۔
اس کاروائی میں کمانڈر رحمت اللہ گرباز سمیت طالبان کے چار اہلکار مارے گئے جبکہ تین زخمی ہوئے۔ اے ایف ایف کے مطابق نئی کاروائیاں رمضان کے بعد شروع ہونے والے بہاریہ آپریشن کا حصہ ہیں، جن کا مقصد طالبان کے مراکز، اڈوں اور چیک پوسٹوں کو نشانہ بنانا ہے۔
دیکھیے: تعلیم پر پابندیاں افغانستان کے مستقبل کیلئے خطرہ ہیں، کرزئی کی طالبان پالیسیوں پر کڑی تنقید