کابل: افغانستان کے سابق صدر حامد کرزئی نے نئے تعلیمی سال کے آغاز پر طالبان قیادت کو خبردار کرتے ہوئے خواتین کی تعلیم اور ملازمت پر پابندیوں کو ملک کے استحکام اور ترقی کیلئے تباہ کن قرار دے دیا۔
اپنے بیان میں حامد کرزئی نے کہا کہ لڑکیوں کیلئے اسکولوں اور یونیورسٹیوں کے دروازے بند رکھنا نہ صرف انسانی حقوق کی خلاف ورزی ہے بلکہ یہ افغانستان کے مستقبل کو بھی شدید نقصان پہنچا رہا ہے۔
انہوں نے زور دیا کہ خواتین کو تعلیم اور روزگار کے مواقع فراہم کیے بغیر ملک ترقی کی راہ پر گامزن نہیں ہو سکتا، اور طالبان کی موجودہ پالیسیاں افغانستان کو عالمی تنہائی اور معاشی بحران کی طرف دھکیل رہی ہیں۔
کرزئی نے کہا کہ خواتین کو معاشرے سے باہر رکھنا ایک غیر دانشمندانہ فیصلہ ہے، جو ملک کی سماجی و اقتصادی ترقی میں رکاوٹ بن رہا ہے، لہٰذا فوری طور پر اسکولز اور جامعات کھولے جائیں۔
تجزیہ کاروں کے مطابق طالبان کی سخت گیر پالیسیوں پر نہ صرف اندرونِ ملک بلکہ عالمی سطح پر بھی شدید تنقید جاری ہے، جبکہ خواتین کی تعلیم پر پابندی افغانستان کیلئے ایک بڑا سفارتی اور انسانی مسئلہ بن چکی ہے۔