لاہور: پاکستانی نژاد برطانوی گلوکار زین ملک نے اپنے نئے میوزک پروجیکٹ میں لیجنڈری قوال نصرت فتح علی خان کو خراجِ تحسین پیش کر کے مداحوں کی توجہ حاصل کر لی۔
ایک حالیہ میوزک شو میں گفتگو کے دوران زین ملک نے اپنے آنے والے البم سے متعلق تفصیلات شیئر کیں۔ شو کے ایک حصے میں مختلف گانے سنائے گئے جنہیں پہچاننے کا ٹاسک دیا گیا۔
اسی دوران نصرت فتح علی خان کا معروف کلام چلایا گیا، جسے زین ملک نے فوری طور پر پہچان لیا۔ انہوں نے کہا کہ نصرت فتح علی خان کی موسیقی نے ان کے فنی سفر پر گہرا اثر ڈالا ہے۔
زین ملک کے مطابق وہ اس عظیم فنکار سے بے حد متاثر ہیں اور ان کی آواز آج بھی دنیا بھر میں سننے والوں کے دلوں کو چھوتی ہے۔
انہوں نے بتایا کہ اپنے نئے البم میں شامل ایک گانے کا نام بھی “نصرت” رکھا ہے، جو اس لیجنڈ کو خراجِ عقیدت پیش کرنے کی ایک کوشش ہے۔
واضح رہے کہ زین ملک کا نیا البم 17 اپریل کو ریلیز ہوگا، جبکہ اس کا گانا “سائیڈ ویز” پہلے ہی جاری کیا جا چکا ہے اور سوشل میڈیا پر مقبول ہو رہا ہے۔
دیکھئیے:علی ظفر ہتکِ عزت کیس میں سرخرو، عدالت کا میشا شفیع کو 50 لاکھ روپے ہرجانہ ادا کرنے کا حکم
