راولپنڈی: پاک افغان سرحد پر سکیورٹی فورسز نے فتنۃ الخوارج کی دراندازی کی کوشش ناکام بناتے ہوئے 8 دہشتگردوں کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کے مطابق ہلاک دہشتگرد بھارتی سرپرستی میں کارروائیاں کرنے والے خارجی عناصر تھے، جو پاکستان میں داخل ہونے کی کوشش کر رہے تھے۔
آئی ایس پی آر کے مطابق کارروائی کے دوران دہشتگردوں کے قبضے سے بھاری مقدار میں اسلحہ اور گولہ بارود بھی برآمد ہوا، جبکہ علاقے میں کلیئرنس آپریشن جاری ہے تاکہ کسی بھی باقی خطرے کو مکمل طور پر ختم کیا جا سکے۔
بیان میں کہا گیا کہ افغان عبوری حکومت کی جانب سے سرحدی نگرانی میں ناکامی ایک بار پھر سامنے آئی ہے، اور افغان حکام پر زور دیا گیا ہے کہ وہ اپنی سرزمین کو پاکستان کے خلاف استعمال ہونے سے روکیں۔
دوسری جانب وزارت اطلاعات نے پاک افغان سرحد سے خاردار تاریں ہٹانے سے متعلق خبروں کو بے بنیاد قرار دیتے ہوئے مسترد کر دیا ہے۔
آئی ایس پی آر کے مطابق ملک بھر میں دہشتگردی کے خاتمے کیلئے آپریشن عزم استحکام کے تحت کارروائیاں مسلسل جاری ہیں اور سکیورٹی فورسز ہر قسم کے خطرات سے نمٹنے کیلئے پرعزم ہیں۔
