وائٹ ہاؤس: ٹرمپ شہباز شریف کی اپیل سے آگاہ، ردعمل جلد متوقع؛ ایران بھی غور میں مصروف ہے

واشنگٹن/اسلام آباد: وائٹ ہاؤس نے تصدیق کی ہے کہ امریکی صدر ڈونلڈ ٹرمپ وزیراعظم شہباز شریف کی جانب سے کی گئی اپیل سے آگاہ ہیں اور اس پر جلد ردعمل دیا جائے گا، جبکہ ایران نے بھی اس تجویز کا جائزہ شروع کر دیا ہے۔

وائٹ ہاؤس کی ترجمان کیرولین لیوٹ نے امریکی میڈیا سے گفتگو میں کہا کہ صدر ٹرمپ پاکستانی وزیراعظم کی درخواست سے باخبر ہیں اور اس پر غور کیا جا رہا ہے۔

دوسری جانب سینئر ایرانی حکام کا کہنا ہے کہ ایران بھی وزیراعظم شہباز شریف کی جانب سے پیش کردہ تجاویز کا جائزہ لے رہا ہے، جس سے سفارتی پیش رفت کے امکانات ظاہر ہو رہے ہیں۔

واضح رہے کہ وزیراعظم شہباز شریف نے امریکی صدر سے ڈیڈ لائن میں دو ہفتوں کی توسیع کی درخواست کی تھی تاکہ جاری سفارتی کوششوں کو کامیاب بنایا جا سکے۔

وزیراعظم نے اپنے بیان میں ایران سے بھی جذبہ خیرسگالی کے تحت آبنائے ہرمز کو دو ہفتوں کیلئے کھولنے کی اپیل کی تھی، جبکہ تمام فریقین پر زور دیا تھا کہ وہ عارضی جنگ بندی پر آمادہ ہوں تاکہ مذاکرات کیلئے سازگار ماحول پیدا کیا جا سکے۔

تجزیہ کاروں کے مطابق پاکستان کی جانب سے پیش کی گئی یہ تجویز خطے میں بڑھتی کشیدگی کے دوران ایک اہم سفارتی پیش رفت ہے، جس پر امریکا اور ایران کے ردعمل کو انتہائی اہم قرار دیا جا رہا ہے۔

دیکھئیے:ایران کے انکار کے بعد وزیراعظم کی ٹرمپ سے ڈیڈ لائن میں دو ہفتے توسیع کی درخواست، ایران سے آبنائے ہرمز کھولنے کا مطالبہ