ایران کے انکار کے بعد وزیراعظم کی ٹرمپ سے ڈیڈ لائن میں دو ہفتے توسیع کی درخواست، ایران سے آبنائے ہرمز کھولنے کا مطالبہ

اسلام آباد: وزیراعظم شہباز شریف نے مشرقِ وسطیٰ میں جاری کشیدگی کے تناظر میں امریکی صدر ڈونلڈ ٹرمپ سے ڈیڈ لائن میں دو ہفتوں کی توسیع کی درخواست کرتے ہوئے ایران سے آبنائے ہرمز عارضی طور پر کھولنے کی اپیل کی ہے۔

سوشل میڈیا پر جاری اپنے بیان میں وزیراعظم نے کہا کہ خطے میں جاری جنگ کے پُرامن حل کیلئے سفارتی کوششیں تیزی سے آگے بڑھ رہی ہیں اور جلد مثبت نتائج سامنے آنے کی توقع ہے۔

انہوں نے امریکی صدر سے درخواست کی کہ سفارتکاری کو مؤثر بنانے کیلئے ڈیڈ لائن میں کم از کم دو ہفتوں کی مہلت دی جائے تاکہ جاری مذاکرات کو نتیجہ خیز بنایا جا سکے۔

وزیراعظم شہباز شریف نے جذبہ خیرسگالی کے تحت ایران سے بھی اپیل کی کہ وہ آبنائے ہرمز کو دو ہفتوں کیلئے کھول دے تاکہ عالمی تجارت اور توانائی کی ترسیل متاثر نہ ہو۔

انہوں نے تمام فریقین پر زور دیا کہ وہ فوری طور پر دو ہفتوں کی مکمل جنگ بندی پر آمادہ ہوں تاکہ کشیدگی کم کی جا سکے اور سفارتی عمل کو کامیابی کی جانب لے جایا جا سکے۔

تجزیہ کاروں کے مطابق پاکستان کی یہ تجویز خطے میں بڑھتی ہوئی کشیدگی کے درمیان ایک اہم سفارتی اقدام ہے، جس کا مقصد ممکنہ بڑے تصادم کو روکنا اور مذاکرات کیلئے سازگار ماحول پیدا کرنا ہے۔

دیکھئیے:ڈیڈلائن سے کچھ گھنٹے قبل ایران مذاکرات سے پیچھے ہٹ گیا، پاکستان کو بتایا ہم جیت رہے ہیں، 15 ہزار میزائل ابھی بھی موجود