اسلام آباد: وزیر دفاع خواجہ آصف کا کہنا ہے کہ ایران اور امریکہ کے درمیان امن مذاکرات کے بعد مجموعی ماحول بہتر نظر آ رہا ہے اور دوبارہ مذاکرات کا امکان اب بھی موجود ہے۔ ان کے مطابق حالیہ پیش رفت مثبت سمت کی عکاسی کرتی ہے۔
پارلیمنٹ ہاؤس کے باہر میڈیا سے گفتگو کرتے ہوئے خواجہ آصف کا کہنا تھا کہ مذاکرات کے بعد کوئی منفی پہلو سامنے نہیں آیا بلکہ مجموعی طور پر مثبت اشارے مل رہے ہیں۔ انہوں نے کہا کہ فریقین کے درمیان رابطہ برقرار ہے اور آئندہ نشست کیلئے فضا سازگار دکھائی دیتی ہے۔
وزیر دفاع نے مزید کہا کہ دوبارہ مذاکرات کے حوالے سے اطمینان پایا جا رہا ہے اور امید ہے کہ اگلے مرحلے میں کسی نہ کسی نتیجے تک پہنچا جا سکے گا۔ تاہم اس حوالے سے حتمی پیش رفت کا انحصار فریقین کے اقدامات پر ہوگا۔
انہوں نے کہا کہ پاکستان خطے میں امن کیلئے اپنا کردار جاری رکھے ہوئے ہے اور حالیہ مذاکرات اسی کوشش کا حصہ ہیں۔ انہوں نے کہا کہ اگلی نشست تک ان شاءاللہ کسی نتیجے تک پہنچ جائیں گے، بھارت کے بارے میں بات کرتے ہوئے کہا کہ اللہ تعالی پاکستان پر بڑا مہربان ہے، بھارت میں صف ماتم ہے۔
تجزیہ کاروں کے مطابق پاکستان کی میزبانی میں ہونے والے مذاکرات کے بعد مثبت ماحول کا قائم رہنا اس بات کی نشاندہی کرتا ہے کہ سفارتی عمل ابھی ختم نہیں ہوا بلکہ آئندہ مراحل میں مزید پیش رفت کا امکان موجود ہے۔
