اسلام آباد: امریکی صدر ڈونلڈ ٹرمپ نے ایران کے ساتھ آئندہ مذاکرات کے لیے پاکستان کو ترجیحی مقام قرار دیتے ہوئے کہا ہے کہ آئندہ دو روز میں پیشرفت کا امکان ہے، جبکہ ایرانی حکام نے بھی دوسرے دور کے لیے پاکستان کو اپنی پہلی ترجیح قرار دیا ہے۔
امریکی اخبار نیو یارک پوسٹ کے مطابق ٹرمپ نے ایک انٹرویو میں کہا کہ “آپ وہیں رہیں کیونکہ آئندہ دو دن میں کچھ ہو سکتا ہے، اور ہم پاکستان جانے پر زیادہ مائل ہیں”۔ انہوں نے مذاکرات کے حوالے سے پاکستان کے کردار کو سراہتے ہوئے آرمی چیف فیلڈ مارشل عاصم منیر کی کارکردگی کو “بہترین” قرار دیا۔
ٹرمپ کا کہنا تھا کہ فیلڈ مارشل عاصم منیر کی کوششوں کے باعث امریکا ایک بار پھر پاکستان میں مذاکرات کے انعقاد پر غور کر رہا ہے۔ تاہم رپورٹس کے مطابق ابتدائی گفتگو میں ٹرمپ نے پاکستان میں مذاکرات کی تردید کی، لیکن بعد ازاں دوبارہ رابطہ کرکے اسلام آباد میں ممکنہ بات چیت کا عندیہ دیا۔
دوسری جانب ایرانی حکام نے بھی جیونیوز سے گفتگو میں کہا کہ ایران مذاکرات کے لیے تیار ہے، تاہم دوسری جانب کی پوزیشن واضح نہیں۔ ان کا کہنا تھا کہ اگر مذاکرات کا دوسرا دور ہوتا ہے تو پاکستان ان کی پہلی ترجیح ہوگا۔
برطانوی خبر ایجنسی رائٹرز کے مطابق ذرائع نے بتایا ہے کہ امریکا اور ایران کے وفود رواں ہفتے امن مذاکرات کے لیے دوبارہ اسلام آباد آ سکتے ہیں۔ اسی حوالے سے پاکستان میں ایرانی سفارتخانے کے ایک اہلکار نے بھی عندیہ دیا کہ مذاکرات کا اگلا دور اسی ہفتے یا آئندہ ہفتے کے آغاز میں متوقع ہے۔
ذرائع کے مطابق پاکستان نے امریکا اور ایران کے درمیان کشیدگی کم کرنے کے لیے بیک ڈور سفارتکاری بھی تیز کر دی ہے، جبکہ علاقائی اور عالمی طاقتوں سے مسلسل رابطے جاری ہیں تاکہ مذاکراتی عمل کو آگے بڑھایا جا سکے۔
واضح رہے کہ حالیہ دنوں میں ایران اور امریکا کے درمیان تناؤ کم کرنے کے لیے سفارتی کوششیں تیز ہوئی ہیں، اور پاکستان ایک ممکنہ ثالث کے طور پر ابھرتا دکھائی دے رہا ہے۔
دیکھئیے:اگر امریکا ایران مذاکرات کا دوسرا دور ہوا تو پاکستان ہماری پہلی ترجیح ہے، ایرانی حکام
