باجوڑ: ضلع باجوڑ کے سرحدی علاقے لوئی ماموند میں افغانستان کی جانب سے فائر کیا گیا مارٹر گولہ ایک رہائشی گھر پر گرنے کے نتیجے میں بچوں سمیت 3 افراد جاں بحق جبکہ 2 زخمی ہو گئے۔
پولیس کے مطابق واقعہ 15 اپریل کو لغڑے کے مقام پر پیش آیا، جہاں مرحوم درویش کے گھر پر مارٹر گولہ آ گرا۔ دھماکے کے نتیجے میں کم عمر معاذ اور عظمیٰ بی بی موقع پر جاں بحق ہو گئے، جبکہ سعیدہ بی بی کو تشویشناک حالت میں اسپتال منتقل کیا گیا جہاں وہ دم توڑ گئیں۔
حکام کے مطابق زخمیوں میں عمر علی اور صادقہ بی بی شامل ہیں، جنہیں فوری طور پر ڈی ایچ کیو ہسپتال خار منتقل کیا گیا، جہاں انہیں طبی امداد فراہم کی جا رہی ہے۔
پولیس کا کہنا ہے کہ واقعہ سرحد پار سے فائرنگ کے نتیجے میں پیش آیا، جبکہ سکیورٹی اداروں نے واقعے کی تحقیقات شروع کر دی ہیں اور علاقے کی صورتحال کا جائزہ لیا جا رہا ہے۔
مقامی ذرائع کے مطابق سرحدی علاقوں میں وقفے وقفے سے ایسے واقعات پیش آتے رہتے ہیں، جس کے باعث شہری آبادی عدم تحفظ کا شکار ہے۔
دیکھئیے:طالبان اور دہشت گردوں کا گٹھ جوڑ بے نقاب: سابق افغان مشیر نے شواہد سامنے رکھ دیے
