انطالیہ: وزیراعظم شہباز شریف سعودی عرب اور قطر کے دورے مکمل کرنے کے بعد امن مشن کے تیسرے مرحلے میں ترکیہ کے شہر انطالیہ پہنچ گئے، جہاں وہ پانچویں انطالیہ ڈپلومیسی فورم میں شرکت کریں گے اور عالمی رہنماؤں سے اہم ملاقاتیں کریں گے۔
وزیراعظم آفس کے مطابق انطالیہ ائیرپورٹ پر گورنر ہلوسی شاہین نے وزیراعظم اور پاکستانی وفد کا استقبال کیا، اس موقع پر ترکیہ میں پاکستان کے سفیر یوسف جنید اور دیگر سفارتی حکام بھی موجود تھے۔
ترجمان کے مطابق وزیراعظم شہباز شریف فورم کے دوران “لیڈرز پینل” میں شرکت کر کے پاکستان کا مؤقف پیش کریں گے، جبکہ ترک صدر رجب طیب اردوان سمیت دیگر عالمی رہنماؤں سے دوطرفہ ملاقاتیں بھی شیڈول میں شامل ہیں۔
وزیراعظم کے ہمراہ وفد میں نائب وزیراعظم و وزیر خارجہ اسحاق ڈار، وزیر اطلاعات عطا اللہ تارڑ، معاون خصوصی طارق فاطمی اور بین الاقوامی میڈیا کے لیے ترجمان مشرف زیدی شامل ہیں۔
اس سے قبل وزیراعظم نے قطر کے دورے کے دوران امیر قطر شیخ تمیم بن حمد الثانی سے ملاقات کی، جس میں خلیجی خطے کی صورتحال پر تبادلہ خیال کیا گیا۔ بیان میں کہا گیا کہ دونوں رہنماؤں نے کشیدگی میں کمی اور مذاکرات کے ذریعے امن کے قیام پر زور دیا، جبکہ وزیراعظم نے خلیجی ممالک پر حملوں کی مذمت کا اعادہ کیا۔
وزیراعظم نے اپنے دورہ سعودی عرب کے دوران ولی عہد شہزادہ محمد بن سلمان سے بھی ملاقات کی تھی، جہاں انہوں نے امریکا ایران جنگ بندی اور اسلام آباد مذاکرات کی پیش رفت سے آگاہ کیا۔ وزیراعظم نے سعودی عرب کے ساتھ مکمل یکجہتی کا اظہار کیا، جبکہ سعودی ولی عہد نے امن عمل میں پاکستان کے کردار، خصوصاً وزیراعظم اور فیلڈ مارشل عاصم منیر کی کوششوں کو سراہا۔
واضح رہے کہ وزیراعظم کا یہ دورہ خطے میں جاری کشیدگی کے تناظر میں ایک وسیع سفارتی مشن کا حصہ ہے، جس کا مقصد عالمی اور علاقائی سطح پر امن و استحکام کے لیے رابطوں کو فروغ دینا ہے۔
دیکھئیے:شہباز شریف کی محمد بن سلمان سے جدہ میں اہم ملاقات، علاقائی امن اور پاک سعودی تعاون پر تبادلہ خیال
