تہران: فیلڈ مارشل سید عاصم منیر نے ایران کے سرکاری دورے کے دوران ایرانی صدر مسعود پزشکیان سے ملاقات کی، جس میں علاقائی صورتحال، دوطرفہ تعلقات اور سکیورٹی امور پر تفصیلی تبادلہ خیال کیا گیا۔
ایرانی میڈیا کے مطابق ملاقات میں وفاقی وزیر داخلہ محسن نقوی اور ایرانی وزیر خارجہ عباس عراقچی بھی موجود تھے، جبکہ دونوں جانب سے باہمی تعاون اور خطے میں امن و استحکام کے فروغ پر زور دیا گیا۔
اس سے قبل فیلڈ مارشل عاصم منیر نے ایران کے خاتم الانبیا سینٹرل ہیڈکوارٹر کے کمانڈر میجر جنرل علی عبداللہی سے بھی ملاقات کی، جس میں دوطرفہ دفاعی تعلقات، علاقائی سکیورٹی اور باہمی تعاون کے امور زیر بحث آئے۔
ایرانی کمانڈر میجر جنرل علی عبداللہی نے اس موقع پر پاکستان اور اس کے عوام کی حمایت پر شکریہ ادا کیا اور حالیہ کشیدگی کے دوران پاکستان کے مؤقف کو سراہا۔ انہوں نے امریکا اور اسرائیل کی مبینہ جارحیت کے مختلف مراحل کا ذکر کرتے ہوئے کہا کہ ایران نے اس دوران اپنی دفاعی صلاحیتوں کا مظاہرہ کیا۔
میجر جنرل عبداللہی کا کہنا تھا کہ حالیہ تنازع میں استعمال ہونے والا تمام سازوسامان مقامی سطح پر تیار کیا گیا، جس کا سہرا ایرانی نوجوانوں کو جاتا ہے۔ انہوں نے مزید کہا کہ ایران کی مسلح افواج کسی بھی ممکنہ جارحیت کے خلاف مکمل دفاعی تیاری رکھتی ہیں۔
واضح رہے کہ فیلڈ مارشل عاصم منیر کا دورہ ایران امریکا کے درمیان جاری سفارتی کوششوں اور خطے میں کشیدگی کم کرنے کے تناظر میں اہم قرار دیا جا رہا ہے۔
