لاہور: وزیراعلیٰ پنجاب مریم نواز نے 50 ایکڑ اراضی پر مشتمل “پنجاب فلم سٹی” کے قیام کا سنگِ میل نما اعلان کر دیا ہے۔ یہ جدید ترین منصوبہ لاہور میں نواز شریف آئی ٹی سٹی کے اندر قائم کیا جا رہا ہے، جو ملک کا پہلا مکمل “اینڈ ٹو اینڈ” میڈیا پروڈکشن مرکز ہوگا جہاں فلم سازی سے لے کر نمائش تک کے تمام مراحل ایک ہی چھت تلے مکمل کیے جا سکیں گے۔
وزیراعلیٰ پنجاب کے مطابق اس منصوبے کا بنیادی مقصد جدید ٹیکنالوجی، عالمی معیار کی سہولتوں اور وسائل کے ذریعے ملکی فلمی صنعت کی بحالی کو یقینی بنانا ہے۔ پنجاب فلم سٹی میں فلم، ٹی وی، اینی میشن اور ڈیجیٹل میڈیا کے لیے جدید ترین اسٹوڈیوز، ساؤنڈ اسٹیج اور پوسٹ پروڈکشن لیبز قائم کی جائیں گی، جس سے تکنیکی مراحل کے لیے بیرونِ ملک پر انحصار میں واضح کمی آئے گی۔
منصوبے کی تفصیلات بتاتے ہوئے مریم نواز نے کہا کہ فلم سٹی میں شوٹنگ کے لیے تمام ضروری سہولتیں، مختلف سیٹس اور ایک مرکزی جھیل بھی تعمیر کی جائے گی۔ اس کے علاوہ بین الاقوامی تقریبات اور ایوارڈ شوز کے لیے بڑے کنونشن ہالز، میڈیا ٹریڈ ہب اور فنونِ لطیفہ کی تربیت کے لیے فلم و میوزک اسکول بھی اس عظیم الشان منصوبے کا حصہ ہوں گے۔
وزیراعلیٰ نے مزید کہا کہ پنجاب فلم سٹی سے روزگار کے ہزاروں براہِ راست اور بالواسطہ مواقع پیدا ہوں گے جبکہ اینی میشن، گیمنگ اور ڈیجیٹل میڈیا کے شعبوں میں انقلاب برپا ہوگا۔ انہوں نے اس منصوبے کو تخلیقی معیشت کے فروغ کے لیے ایک اہم پیش رفت قرار دیتے ہوئے کہا کہ یہ پلیٹ فارم ٹیلنٹ، جدید ٹیکنالوجی اور کاروبار کو یکجا کر کے پاکستانی ثقافت کو عالمی سطح پر اجاگر کرنے میں کلیدی کردار ادا کرے گا۔
