گوادر: گوادر پورٹ پر تجارتی سرگرمیوں میں مسلسل اضافہ دیکھنے میں آ رہا ہے اور پیر کے روز ایک اور بڑا کارگو جہاز ‘ایم وی یوان ہانگ ویئے’ بندرگاہ پر کامیابی سے لنگر انداز ہو گیا ہے۔ اس جہاز کی آمد گوادر پورٹ کے علاقائی تجارتی مرکز کے طور پر ابھرنے کی ایک اور اہم کڑی ثابت ہوئی ہے۔
وفاقی وزیر بحری امور جنید انوار چوہدری نے جہاز کی برتھنگ کا اعلان کرتے ہوئے بتایا کہ اس بحری جہاز پر مجموعی طور پر 34 ہزار ٹن بلک کارگو اور 20 ہزار ٹن دیگر سامان موجود ہے۔ انہوں نے مزید وضاحت کی کہ ابوظہبی اور کویت کے لیے لایا گیا یہ کارگو گوادر پورٹ پر اتارا جائے گا، جہاں سے اسے ٹرانس شپمنٹ کے ذریعے متعلقہ منزلوں کی جانب روانہ کیا جائے گا۔ وفاقی وزیر کا کہنا تھا کہ عالمی شپنگ کمپنیوں کا گوادر پر اعتماد تیزی سے بڑھ رہا ہے اور یہ بندرگاہ اب علاقائی تجارت کا ایک فعال مرکز بنتی جا رہی ہے۔
تجارت کو مزید مہمیز دینے کے لیے وفاقی حکومت نے گوادر پورٹ پر ٹیرف میں بھی تاریخی کمی کا اعلان کیا ہے۔ نئے پالیسی ڈھانچے کے تحت بحری جہازوں کی برتھنگ فیس میں 25 فیصد کمی کر دی گئی ہے، جبکہ ٹرانس شپمنٹ کنٹینرز پر چارجز 40 فیصد اور کنٹینر کارگو پر پورٹ چارجز میں 31 فیصد تک کی بڑی رعایت دی گئی ہے۔ اس کے علاوہ تاجروں کی سہولت کے لیے گوادر پورٹ پر جنرل کارگو کو ایک ماہ تک مفت رکھنے کی ترغیب بھی دی گئی ہے، جس کا مقصد عالمی ٹرانزٹ ٹریفک کو پاکستان کی جانب راغب کرنا ہے۔
دیکھئیے:مشرقِ وسطیٰ بحران کے باعث عالمی منڈی میں تیل کی قیمتوں میں 3 فیصد اضافہ