مظفرآباد: محکمہ سپورٹس، یوتھ اینڈ کلچر کے زیرِ اہتمام منعقدہ آزاد جموں و کشمیر انڈر 23 فٹ بال چیمپئن شپ کامیابی کے ساتھ اختتام پذیر ہو گئی ہے۔ چیمپئن شپ کا فائنل میچ مظفرآباد اور میرپور کی ٹیموں کے درمیان کھیلا گیا، جس میں مظفرآباد کی ٹیم نے بہترین کھیل اور شاندار کارکردگی کا مظاہرہ کرتے ہوئے ایک دلچسپ مقابلے کے بعد فائنل اپنے نام کر لیا۔
اس سلسلے میں چیمپئن شپ کی ایک رنگا رنگ اختتامی تقریب خورشید الحسن خورشید فٹ بال اسٹیڈیم مظفرآباد میں منعقد ہوئی، جس کے مہمانِ خصوصی سیکرٹری سپورٹس، یوتھ اینڈ کلچر انصر یعقوب تھے۔ تقریب میں ڈائریکٹر جنرل سپورٹس ملک شوکت حیات، ڈائریکٹر یوتھ اینڈ کلچر محمد نعمت اللہ عباسی، ڈائریکٹر سپورٹس افتخار صادق، اور صدر آل آزاد کشمیر فٹ بال ایسوسی ایشن مرزا امتیاز سمیت محکمہ کے اعلیٰ افسران، کھلاڑیوں اور شائقینِ فٹ بال کی ایک بڑی تعداد نے شرکت کی۔
اختتامی تقریب کے دوران مہمانِ خصوصی نے ٹورنامنٹ میں نمایاں کارکردگی دکھانے والے کھلاڑیوں اور دونوں ٹیموں میں شیلڈز، میڈلز اور نقد انعامات تقسیم کیے۔ تقریب سے خطاب کرتے ہوئے سیکرٹری سپورٹس انصر یعقوب نے فاتح ٹیم مظفرآباد کو مبارکباد پیش کی اور رنرز اپ میرپور کی ٹیم کی محنت کو بھی سراہا۔ انہوں نے کہا کہ کھیل میں فتح ہمیشہ اسی ٹیم کا مقدر بنتی ہے جو موقع سے بھرپور فائدہ اٹھاتی ہے۔
سیکرٹری سپورٹس نے نوجوانوں کے لیے کھیلوں کے مزید مواقع فراہم کرنے کا عزم ظاہر کرتے ہوئے اعلان کیا کہ آئندہ دنوں میں راولاکوٹ میں ایک بڑے ہاکی ٹورنامنٹ کا انعقاد کیا جائے گا، جبکہ مظفرآباد میں جلد ہی ‘پی ایم گولڈ کپ’ کا آغاز بھی کیا جا رہا ہے۔ انہوں نے مقامی شائقین سے اپیل کی کہ وہ ان ایونٹس میں بھرپور شرکت کریں تاکہ نوجوان کھلاڑیوں کی حوصلہ افزائی کی جا سکے۔
دیکھئیے:مقبوضہ کشمیر میں بھارتی مظالم کی لہر: 31 روز میں خواتین سمیت 700 کشمیری گرفتار